Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 399 Hüküm no: 717 Orijinal metin no: [68a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Irsiye bt. Yani’nin, Yakub Ağa Vakfı’na olan borcu için bağının satıldığı Karye-i Kadı’dan Irsiye bt. Yani nâm zimmîye mahfil-i kazâda Hamza b. Turbâli mahzarında ikrâr edip karye-i mezbûrede Mustafa Bey bağına ve Manol v. Toma bağına ve Mavrodi mülküne ve kilise bağına müntehî olan bağımı mahrûse-i Kostantıniyye’de Yakub Ağa Vakfı’na altı bin dört yüz akçeye ve on bin akçeye el-Hâc Mustafa b. Hasan nâm kimesne ile evkāf-ı mezbûre mütevellîsi olup Dergâh-ı âlî bevvâblarından olan Mustafa b. Mehmed nâm kimesneye rehn-i makbûz vaz‘ eylemişdim hâlâ edâ-yı deyne mecâlim olmayıp sûk-ı sultânîde beyne’t-tâlibîn ve’r-râgıbîn müzâyede olundukda zikr olunan bağ on beş bin akçede karâr edip işbu hâmilü’l-kitâb mezbûr Hamza iki bin akçe dahi ziyâde edip cem‘an on yedi bin nakd râyic fi’l-vakt akçeye mezbûr mütevellî Mustafa Bey ve el-Hâc Mustafa rızâlarıyla bey‘-i bâtt-ı sahîh-i şer‘î birle bey‘ edip kabz-ı semen ve teslîm-i mebî‘ kıldım dedikde mukırra-i mezbûrenin vech-i meşrûh üzre vâki‘ olan ikrârını mukarrun lehü’l-merkūm bi’l-muvâcehe tasdîk eylediği kayd olundu. Tahrîren fî evâhiri Zilka‘de sene elf. Şuhûdü’l-hâl: İlyas Bey b. el-cündî, Hasan b. İsmail, Osman b. Mustafa, Ali b. İbrahim, Sâlih [b.] Halil, Seyfi b. Mustafa ve gayruhüm