Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 400 Hüküm no: 719 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye bt. Mustafa’nın, eşi Keyvan’a hayatta iken verdiği borcu, eşinin ortağından tahsil ettiği Mahrûse-i Üsküdar sâkinelerinden Râziye bt. Mustafa tarafından husûs-ı âtîye Hüseyin Bey b. Hasan ve Mehmed b. Mustafa şehâdetleriyle vekâleti sâbite olan Mustafa Reis b. İbrahim mahfil-i kazâda Ahmed Çelebi b. el-Hâc Kasım muvâcehesinde ikrâr edip mezbûr Ahmed Çelebi ile zevcim müteveffâ Keyvan bakkal dükkânı içinde olan esbâbda müşterekler idi mukaddemâ kendi Keyvan hayâtta iken on binden mütecâviz akçem alıp bâkī üç bin sekiz yüz elli akçe kalmışdı hâlâ zikr olunan üç bin sekiz yüz elli akçeyi bi’t-tamâm ve’l-kemâl alıp vekâleten kabz edip iştirâk da‘vâsından mezbûr Ahmed Çelebi’nin zimmetini ibrâ’ ve iskāt eyledim ba‘de’l-yevm husûs-ı mezbûra müte‘allik da‘vâmız ve nizâ‘ımız yokdur eğer edersek nâ mesmû‘ ola dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm bi’l-muvâcehe tasdîk ve’l-müşâfehe tahkīk eylediği kayd olundu. Şuhûdü’l-hâl: Abdülcelîl Hoca [b.] Şuayib el-imâm, Ali b. Musa, Mehmed b. Behrâm, Rıdvan b. Abdullah