Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 402 Hüküm no: 724 Orijinal metin no: [69a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hamza ve kardeşleri Hacı Aydın ve Hacı Ahmed’in, Mehmed Efendi’deki alacaklarını Maraş’ta tahsil edeceklerine hüccet aldıkları Vilâyet-i Maraş’dan Hacı Hamza b. Eyne Hoca ve karındaşı Hacı Aydın ve Hacı Ahmed nâm kimesneler mahfil-i kazâda vilâyet-i mezbûrede tîmar defterdârı olan kıdvetü’l-emâcid ve’l-a‘yân Mehmed Efendi tarafından vekîl olup vekâleti Seyyid b. es-Seyyid Mehmed ve Ali b. Abdullah şehâdetleri ile sâbitü’l-vekâle olan fahrü’l-akrân Osman Bey mahzarında ikrâr ve takrîr-i kelâm edip bundan akdem müşârunileyh Mehmed Efendi bî-vech yedi yüz elli altı altınım alıp ziyâde zulm eyledi deyu da‘vâ eylemiş idik muslihûn tavassut edip Maraş’da vermek üzre üç yüz elli altına ibrâ’ ve ıslâh eyleyip husûs-ı mezbûr için zimmetini ibrâ’-i âm ile ibrâ’ ve ıslâh eyledik ve yedimize mahtûm tezkere dahi verdi dediklerinden sonra vilâyet-i mezbûreden dahi Avşar b. Ahmed nâm kimesne dahi vekîl-i mezbûr mahzarında ikrâr edip müşârunileyh hazretleri bî-vech yüz elli altınım aldı deyu da‘vâ eylemiş idim muslihûn tavassut edip Maraş’da vermek üzre altmışar guruşa ibrâ’ ve ıslâh eyleyip bu husûs-ı mezbûr için zimmetini ibrâ’-i âm ile ibrâ’ eyledim dedikden sonra mukırrûn-ı mezbûrunun vech-i meşrûh üzre vâki‘ olan ikrârını vekîl-i mezbûr vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Seyyid Mustafa b. Seyyid Mehmed, Ali Bey [b.] Abdullah, Kıdvetü’l-cüyûş Ali Kaya Çavuş-ı Dergâh-ı âlî, Halil Bey Çeribaşı, Ebu’l-Kasım b. Halil ve gayruhüm