Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 403 Hüküm no: 725 Orijinal metin no: [69a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’e annesi, dayısı ve anneannesinden kalan tereke Ebnâ-i sipâhiyândan fahrü’l-akrân Mehmed Bey (…) meclis-i şer‘de yine ebnâ-i sipâhiyândan olup mahrûse-i Üsküdar’da olan ebnâ-i sipâhiyâna serdâr olan fahrü’l-emâsil ve’l-akrân Ahmed Bey b. Abdülmennân ve zahrü’l-muhadderât Mümine Hâtun bt. Abdullah tarafından husûs-ı âtîye İlyas Bey b. Abdullah ve Bekir Bey b. Abdullah şehâdetleriyle vekâleti sâbite olan Veli Bey b. Abdullah mahzarında ikrâr ve takrîr-i merâm kılıp ben sagīr iken vâlideynim fevt olup dayım Ahmed Ağa bana âid olan hisse-i şer‘iyyemden ba‘zısın alıp bir mikdâr dahi alâkam var iken ol dahi fevt olup cümle metrûkâtı vâlidem vâlidesi ceddem Ayşe’ye kalıp ol dahi fevt olup cümle metrûkâtı mezbûr Ahmed Bey ve Mümine Hâtun zabt ve kabz edip ve mezbûr Ahmed Bey yine büyük anamın bir evin ve bir câriyem aldı deyu mâ-beynimizde münâza‘at-ı kesîre ve muhâsemât-ı şedîdemiz vâki‘ olmuşdu hâlâ müslimûn-ı muslihûn mâ-beynimizi ıslâh edip bedel-i sulh bana on bin akçe verip ben dahi bedel-i sulh olan on iki bin akçemi bi’t-tamâm alıp kabûl ve kabz edip ba‘de’l-yevm câriye da‘vâsından Ahmed Ağa metrûkâtından ve merkūme Ayşe’nin metrûkâtı da‘vâsından ve ev da‘vâsından mûmâileyhimâ el-merkūmânın deyinlerini ibrâ’-i âmla ibrâ’ ve iskāt-ı tâmla iskāt eyledim eğer bir dahi husûs-ı mezbûra müte‘allik benden veya vekîlimden da‘vâ sâdıra olursa lede’l-hükkâmi’l-kirâm nâ mesmû‘ ola dedikde mukırr-ı mezbûrun vech-i meşrûh üzre vâki‘ olan ikrârını mukırrân lehüma’l-merkūmân taraflarından vekîl-i merkūm bi’l-muvâcehe tasdîk ve’l-müşâfehe tahkīk eyledikde mâ vaka‘a kayd şud. Fi’t-târihi’l-mezbûr. Şuhûdü’l-hâl: Müstedâm Bey el-cündî, Ali Bey b. Abdullah el-cündî, Yusuf Bey b. Abdullah el-cündî, Ali Çelebi b. Mahmud, Hüseyin b. Veliyyüddin, Mahmud b. Kara Hacı, Muharrem b. Hızır, Hüseyin b. Behrâm, Mustafa b. Mehmed, Ahmed b. Musa ve gayruhüm