Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 257 Hüküm no: 242 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tomas v. Anaştaş’ın evini Bevvabü’s-sultânî el-Hâc Hasan Ağa Vakfı’na sattığı Mübâya‘a. Mahmiye-i İstanbul’da Tevkî‘i Ca‘fer Mahallesi mütemekkinlerinden Tomas v. Anaştaş nâm Ermeni meclis-i şer‘-i şerîf-i enverde ashâb-ı hayrâtdan merhûm Bevvâbü’s-sultânî el-Hâc Hasan Ağa’nın mahmiye-i mezbûrede Akbıyık Mahallesi’nde vâki‘ binâ eylediği çeşme ve vilâyet-i Anadolu’da Çerkeş kazâsında Çalıcaviran nâm karyede ta‘mîr ve ihyâ eylediği câmi‘-i şerîf mühimmâtlarına mevkūfe nukūda kāimmakām-ı mütevellî olan bâ‘sü hâze’l-kitâb el-Hâc Hasan Ağa b. Receb mahzarında ikrâr ve takrîr-i kelâm edip vakf-ı mezbûr vakfiye-i ma‘mûlün-bihâsında nukūd-ı mevkūfe-i mezkûresini akāra tebdîli şart eylediği ecilden akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan karındaşım Yanaki zimmî ve bir tarafdan kız karındaşım Fotini nâm Nasrâniye mülkleri ve bir tarafdan Balıkçı zevcesi Benli nâm Nasrâniye tasarrufunda olan vakıf menzil ve bir tarafdan tarîk-i âm ile mahdûd fevkānî iki oda ve dehlîz ve tahta-bend ve tahtânî iki oda ve bir sofa ve dehlîz ve kız karındaşım Fotini ile müşterek bi’r-i mâ ve kenîf ve bir mikdâr bahçeyi muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mütevellî-i mezbûra beş yüz guruşa bey‘ ve temlîk ve teslîm ol dahi nukūd-ı mevkūfe-i mezkûre ile vakf-ı mezbûra akār için bi’t-tevliye iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr beş yüz guruşu yedinden tamamen ahz u kabz eyledim min-ba‘d menzil-i mahdûd-ı mezkûr vakf-ı mezbûr müstagallâtından olup kat‘â benim alâka ve medhalim kalmamağın menzil-i mezkûr tağyîr ve gabnine müte‘allika âmme-i da‘vâdan mütevellî-i mezbûru ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 Cemâziyelâhir sene [1]143. Şuhûdü’l-hâl: Bostanî el-Hâc Osman b. Mustafa, Mehmed Çelebi b. Abdullah, İbrahim Çelebi b. Mustafa, Abdullah b. Mustafa, eş-Şeyh Ahmed Efendi b. Şeyh Mehmed Efendi imâm-ı Akbıyık, Halil Ağa mütevellî-i Küçük Ayasofya, Abdullah Efendi b. İbrahim, Bevvâb-ı sultânî Muhzırbaşı Mustafa Ağa, Mehmed Ağa mütevellî-i Yıldırım, İsmail b. Hüseyin, İsmail Efendi b. el-Hâc İbrahim muhâsib-i Bâbüssaâde.