Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 411 Hüküm no: 743 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Hacı’nın eşyalarını çaldığını iddia ettiği Hasan b. Abdullah ve Ali hakkındaki davayı ispat için süre istediği Vech-i tahrîr-i sicil budur ki Mahmud b. Hacı mahfil-i kazâda Hasan b. Abdullah nâm kimesne ile Ali nâm emredi ihzâr ve mahzarlarında takrîr-i da‘vâ edip mezbûr benim hizmetkârım olup beş bin nakid akçe ile nice esbâb ve erzâkım ahz edip firâr eylemiş idi hâlen mezbûr Hasan’dan suâl olunup vukû‘ı üzre tahrîr olunmasın taleb ederim dedikde gıbbe’s-suâl mezbûr Hasan cevâb verip fi’l-hakīka mezbûr Ali bana geldi lâkin esbâb ve akçe getirmedi haberim yokdur deyip mezbûr Ali’den suâl olundukda cevâb verip bundan akdem rızâm ile mezbûr Mahmud’a hizmet için yanına varmış idim lâkin merkūm odada yok iken esbâb ve erzâkını koyup gidip merkūm Hasan’ın yanına geldim akçe ve esbâbını almadım haberim yokdur deyip mezbûr Mahmud merkūm Ali bâliğ olmuş mudur suâl olunsun dedikde mezbûr Ali dahi bâliğ olmadım deyu cevâb verdikden sonra merkūm Mahmud’a mezkûr Ali gittikde esbâb ve akçesin alıp gittiğine beyyine taleb olunup mezbûr dahi beyyinem vardır lâkin hâzır değildir mehl-i şer‘î taleb ederim dedikde târih-i kitâbdan üç gün tamâmına değin mehil verildiği bi’t-taleb tahrîr olundu Tahrîren fi’l-yevmi’l-hâmis min şehri Zilhicce sene elf. Şuhûdü’l-hâl: Hamza Subaşı yayabaşıyân-ı hâssa, Hasan b. Hamza, Mehmed b. Behrâm ve gayruhüm