Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 412 Hüküm no: 744 Orijinal metin no: [71a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Sinan’ın, evini Hüseyin Subaşı’ya bey‘ bi’l-istiğlâl yoluyla sattığı Budur ki Osman b. Sinan mahfil-i kazâda hâssa bölükbaşılarından Hüseyin Subaşı tarafından vekîl olup vekâleti nehc-i şer‘î üzre sâbite olan kıdvetü’l-emâsil Müstedâm Bey el-cündî mahzarında ikrâr ve takrîr-i kelâm edip Çavuş mahallesinde bir tarafı Dîvâne Mehmed mülkü ile ve bir tarafı Pervâne Hoca mülkü ile ve iki tarafı tarîk-i âm ile mahdûd olan mülk evimi istiğlâl tarîkiyle beş bin beş yüz akçeye mezbûr Hüseyin Subaşı’ya bey‘ edip teslîm-i mebî‘ ve kabz-ı semen kıldıkdan sonra târih-i kitâbdan üç yüz gün tamâmına değin beş yüz akçe icâreye aldım kabûl eyledim dedikde mukırr-ı mezbûrun vech-i meşrûh üzre vâki‘ olan ikrârını vekîl-i mezbûr vicâhen tasdîk ettikden sonra mâ vaka‘a bi’t-taleb tahrîr olundu. Tahrîren fi’l-yevmi’l-hâmis min şehri Zilhicce sene elf. Şuhûdü’l-hâl: Kıdvetü’l-akrân Mehmed Ağa-yı Anadolu, Kurd er-râcil, Mehmed b. Ahmed, Hasan b. Hamza, Mehmed b. Behrâm, Ali [b.] Abdullah Acemi oğlanı, Muttalib b. Süleyman, Davud [b.] Abdullah