Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 415 Hüküm no: 751 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Güvendik b. Ali’nin, ölen Kasım’a olan borcunu Kasım’ın oğlu İbrahim b. Abdullah’a verdiği ve kardeşler arasındaki hisse anlaşmazlığı Güvendik b. Ali mahfil-i kazâya el-Hâc İbrahim b. Abdullah nâm kimesneyi ihzâr ve mahzarında takrîr-i kelâm edip bundan akdem vefât eden mahrûse-i Tokat sâkinlerinden Kasım nâm kimesnenin bende dört yüz guruşu olup vefât ettikde oğlu Mehmed Çavuş ve İbrahim Çelebi mezbûru vekîl edip mezbûr İbrahim dahi dört yüz guruş bi’t-tamâm alıp kabz eyledikden sonra müteveffâ-yı mezbûrun kızı Hatice’nin zevci Eymir Çavuş zikr olunan dört yüz guruşdan zevcem Hatice’ye yüz kırk iki guruş hisse âid olur hissesini fuzûlî teslîm etmişsin deyu benden cebren hilâf-ı şer‘-i şerîf aldı ben dahi mezbûr el-Hâc İbrahim’den taleb ederim dedikde gıbbe’s-suâl mezbûr el-Hâc İbrahim cevâb verip bundan akdem mezbûr Güvendik, Amasya kadısı huzûrunda meblağ-ı merkūm yüz kırk iki guruşu müteveffâ-yı mezbûrun oğlu Mehmed Çavuş mahzarında benden taleb eyledikde mezbûr Mehmed Çavuş dört yüz guruşu mezbûr el-Hâc İbrahim’den bi’t-tamâm alıp kabz edip babamızın ba‘zı düyûn-ı müsbite ve harc-ı ma‘kūlüne sarf eyledik cümle verese bir yere gelelim lâzım gelirse kız karındaşı Hatice’ye yüz kırk iki guruşu edâ edelim deyu mu‘terif olup yedine hüccet-i şer‘iyye verilmişdir dedikde gıbbe’l-inkâr dergâh-ı sikātdan Dergâh-ı âlî bevvâblarından olup Harameyn-i Şerîfeyn kâtibi olan Perviz Bey b. Abdullah ve merhûm ve magfûrun-leh Sultân Bayezid Hân aleyhi’r-rahmetü ve’r-rıdvân hazretlerinin evkāfında câbi olan Mustafa’nın el-bevvâbü’s-sultânî mahfil-i kazâya hâzırân olup fi’l-hakīka müteveffâ-yı merkūmun oğlu Mehmed Çavuş Amasya kadısı huzûrunda dört yüz guruşu mezbûr el-Hâc İbrahim yedinden alıp kabz edip babamızın ba‘zı düyûn-ı müsbite ve sâir harc-ı ma‘kūlüne sarf eyledik cümle verese bir yere gelelim lâzım gelirse yüz kırk iki guruşu edâ edelim dedi eğer mezbûr Mehmed Çavuş meblağ-ı mezbûr yüz kırk iki guruşu merkūm Güvendik vermezse biz kendi yanımızdan edâ edelim dediklerinden sonra mezbûr el-Hâc İbrahim dahi fi’l-hakīka merkūm Güvendik yüz kırk iki guruş merkūm Mehmed Çavuş’dan taleb eylesin vermezse ben edâ edeyim dediği bi’t-taleb tahrîr olunup yed-i tâlibe vaz‘ ve def’ olundu ki müzekkir-i mâ-cerâ ola. Fi’t-târihi’l-mezbûr. Şuhûdü’l-hâl: Mustafa Çavuş Mirmîrân, Hasan b. Sâdık, Mehmed b. Behrâm, Osman b. Abdullah ve gayruhüm