Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 421 Hüküm no: 768 Orijinal metin no: [73a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud b. Hüseyin’in, ev yaptığı yerin Râbia Hâtun bt. Ali’ye ait olduğu, ev için harcanan masrafın belirlenmesi Mahrûse-i Üsküdar sâkinlerinden Davud b. Hüseyin mahfil-i kazâya gelip bundan akdem sipâhi oğlanları zümresinden Mahmud Bey mahrûse-i mezbûrede vâki‘ inde’l-ahâlî ma‘lûmü’l-hudûd ev yerini bana iki bin akçeye bey‘ edip ben dahi zikr olunan yere havlu ve bir bâb ev binâ eylemiş iken hâlâ Râbia Hâtun bt. Ali nâm hâtun zikr olunan ev yeri vâlidesinden intikāl eylediğini isbât edip şer‘ ile hükm olunmuş idi hâlâ üzerine varılıp zikr olunan yerin havlusuna ve binâ eylediğim eve ne mikdâr harcım olmuşdur tahmîn-i sahîh ile tahmîn olunup vukû‘ı üzre tahrîr olunmasın taleb ederim dedikde zeyl-i kitâbda ismi mastûr olan Müslümanlar ile hâssa mi‘mârlardan Mehmed Bey mahkeme kâtibi Mevlânâ Mehmed irsâl olunup vardıkda zikr olunan yerin havluya ve eve sarf olunan tahta kereste ve pedavra ve enseri ve neccâriye ve ırgâdiyesi cem‘an iki bin sekiz yüz akçe ile ancak olur deyu tahmîn olunduğunu Mevlânâ İbrahim haber vermeğin mâ vaka‘a tahrîr olundu. Şuhûdü’l-hâl: İbrahim Çelebi, Süleyman [b.] Mehmed, Sinan b. Hasan Nalband, Mahmud Bey [b.] Ali, Hüseyin b. Receb ve gayruhüm