Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 422 Hüküm no: 769 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihrî ve Şehrî hanımların babalarından kalan bağı Hacı b. Bereket’e sattığı Mahrûse-i Üsküdar’a tâbi‘ nâhiye-i Karamürsel’den Mihrî ve Şehrî bintey Yusuf nâm hâtunlar taraflarından husûs-ı âtîye vekâleti Yunus b. Bereket ve Ali b. Hızır şehâdetleriyle sâbite olan Mustafa b. Hasan mahfil-i kazâda işbu karye-i Konuklu’dan Hacı b. Bereket nâm kimesne mahzarında ikrâr ve takrîr-i merâm edip karye-i Konuklu’da Göde nâm mevzi‘de Pîrî b. Emirza ve Fakih b. Receb ve Ali b. Eğlence mülkleriyle ve tarîk-i âmla mahdûd olup müvekkilelerimin babalarından intikāl edip üç dört yıldan ziyâde tasarrufunda olan bağlarını târih-i kitâbdan üç yıl mukaddem mezbûr Hacı’ya iki bin sekiz yüz akçeye bey‘ edip teslîm-i mebî‘ ve kabz-ı semen eylediler dedikde mukırr-ı mezbûrun vech-i meşrûh üzre olan ikrârını mukarrun lehü’l-merkūm bi’l-muvâcehe tasdîk ve’l-müşâfehe tahkīk eylediği kayd şud. Şuhûdü’l-hâl: Halil b. Behrâm, Hasan b. Sâdık, Hüdaverdi b. Mehmed, Mehmed b. Behrâm, Şemseddin b. Sâdık Yevmü’s-sülesâ el-hâmis aşer min şehri Zilhicceti’ş-şerîfe sene elf