Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 261 Hüküm no: 246 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflak asıllı Timurhan’ın azat edilmesi Itâknâme. Mahmiye-i İstanbul’da Sancakdâr Hayreddin Mahallesi sâkinlerinden olup Cebehâne-i âmire’de ikinci halîfe olan mefharü erbâbi’t-tahrîr ve’l-kalem zübdetü ashâbi’t-tastîr ve’r-rakam İbrahim Efendi b. Sunullah b. Abdullah tarafından husûs-ı âti’z-zikri ikrâra vekîl olduğu mârru’z-zikr Cebehâne-i âmire huddâmından Ahmed Ağa b. İbrahim ve Ahmed Beşe b. Ali nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan İkinci İsmail Ağa b. Abdullah meclis-i şer‘-i şerîf-i enverde bi’l-vekâle ikrâr ve takrîr-i kelâm edip müvekkilim-i mûmâ-ileyh İbrahim Efendi ıtk-ı âtî sudûruna değin kendilere rıkkını mu‘terife olan uzun boylu, açık kaşlı, elâ gözlü kara Eflakiyyetü’l-asl Müslimetü’l-mille bâ‘isetü hâzihî[53b]’l-vesîka Timurhan bt. Abdullah’ı hasbeten lillâhi te‘âlâ mâlından âzâd ve mülkünden ihrâc ve kayd-ı rıkdan ıtlâk ve sâir harâir-i asliyyât zümresine ilhâk eyledi fîmâ-ba‘d mezbûr Timurhan sâir harâir-i asliyyât gibi hürre olup üzerinde velâ-i şer‘îden gayrı nesne hakkı bâkī kalmadı dedikde mâ-vaka‘a bi’t-taleb ketb olundu. Fî 21 Cemâziyelâhir sene [1]143. Şuhûdü’l-hâl: Ahmed Ağa b. İbrahim, Ahmed Beşe b. Ali, Mehmed Çelebi b. Abdullah, İbrahim Çelebi b. Mustafa, Mehmed b. Ahmed.