Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 262 Hüküm no: 247 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Abdullah b. es-Seyyid Abdülvehhab’ın Fâtıma Hatun Vakfı’na ait evi kiraladığı Mahmiye-i İstanbul’da Vâlidehanı’nda sâkin tüccârdan es-Seyyid Abdullah b. es-Seyyid Abdülvehhab meclis-i şer‘-i şerîf-i enverde ashâb-ı hayrâtdan Fâtıma Hatun nâm sâhibü’l-hayrın vakfına evlâdiyet ve meşrûtiyyet üzere mütevellîsi olan fahrü’l-müderrisîni’l-kirâm hâfızü’l-kitâb Abdülbâki Ârif Efendi b. el-müvellâ el-merhûm Kethüdâzâde Mehmed Efendi tarafından husûs-ı âti’z-zikri tasdîka vekîl-i şer‘îsi Abdullah Efendi b. İbrahim mahzarında ikrâr-ı tâm ve takrîr-i kelâm edip vakf-ı mezbûr akāratından olup mahmiye-i mezbûrede Acıçeşme kurbünde Sahaf Süleyman Mahallesi’nde vâki‘ bir tarafdan ba‘zan Sahaf Süleyman Câmi‘-i şerîfi ve ba‘zan yine vakf-ı mezbûrdan olan arsa ve bir tarafdan yine vakf-ı mezbûrdan Burhâneddin Ağa tasarrufunda olan bahçe ve bir tarafdan yine vakf-ı mezbûrdan Hadice Hatun tasarrufunda olan menzil ve bir tarafdan tarîk-i âm ile mahdûd tûlen ve arzen bi-hesâb-ı terbî‘i üç yüz on yedi zirâ‘ arsa üzerine mebnî menzilin dâhiliyesine bi’l-icâreteyn mutasarrıfe olan Fethi Hatun bilâ-veled fevt olup dâhiliye-i merkūme taraf-ı vakfa âid olmağla zikrolan dâhiliyeyi mütevellî-i merkūm taraf-ı vakfdan bedel-i misli olan yetmiş iki bin akçe mu‘accel mukābelesinde bana îcâr ve teslîm ben dahi ber-vech-i muharrer istîcâr ve kabûl ve tesellüm eylediğimden sonra bedel-i mezbûr yetmiş iki bin akçeyi mütevellî-i merkūma def‘ ve teslîm ol dahi bi’t-tevliye ahz u kabz ve mesârif-i vakfa sarfla istihlâk edip hâlâ ber-vech-i muharrer mu‘accele deyü mütevellî-i merkūma teslîm eylediğim meblağ-ı müstehlek-i merkūm yetmiş iki bin akçeye müte‘allika âmme-i da‘vâ ve kâffe-i mütâlebâtdan müvekkil-i merkūm Abdülbâki Ârif Efendi ile taraf-ı vakf-ı mezbûru ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 Cumâdelâhire sene [1]143. Şuhûdü’l-hâl: El-hâc Yusuf b. el-Hâc Süleyman, el-Hâc Hasan b. Receb, Çukadâr Yusuf b. Abdullah, İbrahim Çelebi b. Ahmed, es-Seyyid Muharrem câbî-i vakf, Mehmed Efendi b. İbrahim Müezzinzâde, Mustafa Efendi b. Yunus Efendi başkâtib.