Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 422 Hüküm no: 770 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Bekir b. el-Hâc İsa’nın, Mustafa Bey’den alacağı olmadığı Budur ki Vilâyet-i Anadolu’da Beyşehri kazâsında sâkin olan Hacı Bekir b. el-Hâc İsa mahfil-i kazâda vilâyet-i mezbûre sâkini olan kıdvetü’l-ümerâi’l-kirâm umdetü’l-küberâi’l-fihâm Mustafa Bey -dâme ikbâluhû- tarafından vekîl olup vekâleti nehc-i şer‘î üzre sâbite olan Mehmed b. Hasan mahzarında takrîr-i kelâm edip mûmâileyh Mustafa Bey vilâyet-i mezbûre beyi iken benden bî-vech otuz beş guruşum alıp taleb eylediğimde muslihûn tavassut edip yirmi guruşa ıslâh eyleyip hâlâ bedel-i sulhu vermede inâd eder taleb ederim dedikde gıbbe’s-suâl vekîl-i mezbûr cevâb verip fi’l-hakīka yirmi guruşa ıslâh eyleyip bedel-i sulhu bi’t-tamâm teslîm eyleyip mezbûr dahi kabz eyledi bir habbe bâkī kalmamışdır dedikde vekîl-i mezbûrun takrîrine muvâfık beyyine taleb olundukda udûl-i müslimînden fahrü’l-mülâzimîn Abdurrahman Efendi b. Hürrem ve Siyami Efendi b. Mustafa nâm kimesneler mahfil-i kazâya hâzırân olup fi’l-hakīka müşârunileyh hazretleri ile îd-i şerîfde musâfaha için vardığımızda bir mikdâr evvelce gelmiş olsaydınız bir kimesne bizden otuz beş guruş da‘vâ edip yirmi guruşa ıslâh edip bi’t-tamâm teslîm eyledim sizi işhâd ederdim dedikde eğer yakın ise da‘vet etsinler dediğimizde adam gönderip mezbûru getirdiklerinde bizim huzûrumuzda ikrâr edip bundan akdem müşârunileyh hazretlerinden otuz beş guruş da‘vâ eylemiş idim yirmi guruşa ıslâh eyleyip bedel-i sulh olan yirmi guruşu bi’t-tamâm alıp kabz edip husûs-ı mezbûr için zimmetini ibrâ’-i âm ile ibrâ’ eyledim şâyed vilâyetimiz beyi olup bir ihsân? görem dedi bu husûsa şâhidleriz şehâdet ederiz dediklerinde ba‘de’t-ta‘dîl mezbûr Hacı v. İsa mezbûrân ile adâvet-i dünyeviyyem vardır dediği bi’t-taleb tahrîr olundu. Şuhûdü’l-hâl: Mehmed b. Abdullah, Kurd b. Abdullah er-râcil, Davud b. Abdullah ve gayruhüm