Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 435 Hüküm no: 802 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. İlyas’ın, evini Hüseyin Bey b. Hasan’a sattığı Mahrûse-i Üsküdar’da vâki‘ Selman Ağa mahallesinde sâkin Mustafa b. İlyas mahfil-i kazâda mahalle-i merkūmeden olup hâssa cerrâhlarından işbu hâmilü’l-kitâb Hüseyin Bey b. Hasan nâm kimesne mahzarında ikrâr ve takrîr-i merâm kılıp mahalle-i merkūmede Süleyman Korucu b. Abdullah ve İbrahim Bey mülkleriyle ve tarîk-i âmla mahdûd olup bir çatma evi ve bir hayâtı ve bir çardağı ve altında odayı ve ahırı ve kuyuyu ve müsterâhı ve bahçeyi müştemil olan mülk menzilimi merhûm Hüseyin Bey’e on sekiz bin nakd râyic fi’l-vakt akçeye bey‘-i bâtt-ı sahîh-i şer‘î birle bey‘ edip kabz-ı semen ve teslîm-i mebî‘ kıldım dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen tasdîk ve şifâhen tahkīk eyledikde mâ vaka‘a bi’t-taleb kayd olundu. Şuhûdü’l-hâl: Hamza Subaşı, Mehmed Subaşı, Müstedâm Bey, Hasan b. Sâdık, Hüseyin b. Sâdık, Ömer ez-Zu‘emâ, Yahya Bey b. Mehmed el-Hamzavî, Mehmed b. Behrâm, Ali Hoca b. Mahmud ve gayruhüm Yevmü’l-erbi‘â fi’l-yevmi’s-sâlis ve’l-ışrîn min şehri Zilhicce sene elf