Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 438 Hüküm no: 810 Orijinal metin no: [77a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kemhacıbaşı Ferhad Ağa Vakfı’ndan, Mahmud Paşa’nın aldığı borca Abdurrahman Ağa’nın kefil olduğu Hâlâ Kars beylerbeyisi olan emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm el-muhtas bi mezîdi inâyeti’l-meliki’l-a‘lâ Mahmud Paşa -dâme ikbâluhû- tarafından ikrâr-ı âti’z-zikre vekîl olup vekâleti nehc-i şer‘î üzre sâbit olan Dergâh-ı âlî çavuşlarından fahrü’l-emâsil ve’l-akrân Mustafa Çavuş mahfil-i kazâda bâ‘isü’l-hurûf Kemhacıbaşı Ferhad Ağa evkāfına bi’l-fi‘l mütevellî olan Ahmed Bey b. Kasım mahzarında ikrâr ve takrîr-i kelâm edip müvekkilim müşârunileyh hazretleri mütevellî-yi mezbûr yedinden otuz üç bin akçe karz ve târih-i kitâbdan bir yıl tamâmına değin vermek üzre üç bin üç yüz akçe dahi çuka bahâsından lâzımü’l-edâ ve vâcibü’l-kazâ deynidir dedikde mukırr-ı mezbûrun vech-i meşrûh üzre vâki‘ olan ikrârını mütevellî-yi mezbûr vicâhen ve şifâhen tasdîk ettikden sonra meblağ-ı mezbûrun zararına emr-i dâyin ve kabûl-ı medyûn ile müşârunileyh hazretlerinin karındaşı olup hâssa çavuşlardan olan kıdvetü’l-emâcid ve’l-a‘yân ve fahrü’l-ekābir ve’l-akrân Abdurrahman Ağa hazretleri kefîl bi’l-mâl oldum dedikde mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Müstedâm Bey el-cündî, Mehmed Bey Subaşı-ı mahalle-i Ma‘mûre, Turgud Kemhacıyân-ı hâssa, Muttalib b. Süleyman ve gayruhû Yevmü’l-Cum‘a fi’l-yevmi’l-hâmis ve’l-ışrîn min şehri Zilhicceti’ş-şerîfe sene elf