Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 441 Hüküm no: 815 Orijinal metin no: [77b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın babasından kalan hisseleri kardeşlerinden tahsil ettiği Budur ki Mahrûse-i Üsküdar muzâfâtından Nerdübanlı nâm karye sâkinlerinden Mehmed b. Hasan mahfil-i kazâda bâ‘isey el-hurûf karındaşı Pîrî ve Musa nâm kimesneler mahzarlarında ikrâr ve takrîr-i kelâm edip babamdan bana intikāl eden nukūddan sekiz bin akçe hissem zuhûr edip hâlâ sekiz bin akçeyi ve sâir emlâkdan ve yerden ve bostan yerinden intikāl eden hissemi mezbûrân bundan akdem on sekiz bin akçeye bey‘ etmiş idim hâlâ zikr olunan on sekiz bin akçeyi mezbûrân yedlerinden bi’t-tamâm ve’l-kemâl alıp kabz eyledim ba‘de’l-yevm husûs-ı mezbûra müte‘allik da‘vâ ve nizâ‘ edersem lede’l-hükkâm istimâ‘ olunmaya dedikde mukırr-ı mezbûrun vech-i meşrûh üzre vâki‘ olan ikrârını mezbûrân Pîrî ve Musa vicâhen ve şifâhen tasdîk ettiklerinden sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: El-Hâc Murad Halîfe el-hatîb, Hasan Bâzârbaşı sâbıkan, Muttalib [b.] Süleyman, Mehmed b. Behrâm, Ali b. Hüseyin, Mehmed b. Murad, Osman [b.] Murad, Nasûh [b.] Abdüllatif ve gayruhüm