Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 265 Hüküm no: 252 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Halil Ağa b. Abdullah’ın evindeki hissesini Şeyhülisâm Mirzazâde Mehmed Efendi’ye sattığı Husûs-ı âti’l-beyânın mahallinde ketb ü tahrîri emrolunmağın imtisâlen-leh cânib-i şer‘-i mutahhardan bu fakīr bi-nefsihî hâlâ mesned-ârâ-yı sadr-ı fetvâ ve ziynet-i efzâ-yı erîke-i vera‘-i takvâ olan sultânü’l-ulemâi’l-izâm burhânü’l-fudelâi’l-fihâm hallâlü’l-müşkilâti’d-dîniyye keşşâfü’l-mu‘dilâti’l-yakīniyye telvîh-i ibârâta menârü’l-hidâyete ke’l-büdûr ve tavzîh-i işârâta şifâen limâ fi’s-sudûr kâşifü künûzü’l-hakāyık bi’l-fikri’s-sâkıb câmi‘u rumûzi’d-dekāyık bi’r-re’yi’s-sâib ferîd-i asr ve vahid-i dehr hazret-i şeyh-i meşâyihü’l-islâm -sellemehüllâhü’l-meliki’l-allâm- semâhatlü inâyetlü fazîletli eş-Şeyh Mehmed Efendi b. el-müvellâ el-merhûm Mirza Mehmed Efendi hazretlerinin dârü’l-hilâfeti’l-aliyye Mahmiye-i Kostantıniyye -humiyet ani’l-âfât ve’l-beliyye-’de merhûm Sultan Süleyman Hân Câmi‘-i şerîfi kurbünde ( ) Mahallesi’nde sâkin oldukları sa‘âdet-hânelerine varıp akd-i meclis-i şer‘-i nebevî olundukda mahmiye-i mezbûrede ( ) Mahallesi sükkânından el-Hâc Halil Ağa b. Abdullah meclis-i ma‘kūd-ı mezkûrda müşârun-ileyh hazretleri muvâcehelerinde bi-tav‘ihi ikrâr-ı tâm ve takrîr-i kelâm edip işbu müşâhede olunan taraf-ı şarkīsi ba‘zan tarîk-i âm ve ba‘zan Cenderecizâde Muhyiddin Çelebi türbesi ve mekābir-i Müslimîn ve ba‘zan mârru’z-zikr Muhyiddin Vakfı’ndan Molla Mahmud tasarrufunda olan menzil ve ba‘zan vakf-ı mezbûr mektebi ve ba‘zan yine vakf-ı mezbûrdan eş-Şeyh Hasan Efendi tasarrufunda olan menzil ve ba‘zan yine vakf-ı mezbûrdan el-Hâc tasarrufunda olan menzil ve ba‘zan yine vakf-ı mezbûrdan Fâtıma Hatun tasarrufunda olan menzil ve ba‘zan Topkapısı’nda vâki‘ Ahmed Paşa Vakfı’ndan Sarâyî Fâtıma Hatun tasarrufunda olan menzil ve taraf-ı cenûbîsi ba‘zan Emir odaları demekle ma‘rûf dört aded müte’ehhilîn odaları ve ba‘zan vakf-ı mezbûrdan Yusuf Efendi tasarrufunda olan menzil ve bahçe ve ba‘zan tarîk-i hâs ve taraf-ı garbîsi ba‘zan Kasım Efendizâde Mehmed Efendi arsası ve ba‘zan vakf-ı mezbûrdan vezîr-i rûşen-zamîr Köprülüzâde Abdullah Paşa hazretleri tasarruflarında olan bahçe ve ba‘zan müşteri-i müşârun-ileyh hazretleri tasarruflarında olan Fâtıma bt. Firuz Vakfı’ndan gallesi imâma meşrûta menzil ve ba‘zan yine Fâtıma bt. Firuz Vakfı’ndan imâma meşrûta olup Afîfe Hanım tasarrufunda olan menzil ve taraf-ı şimâlîsi tarîk-i âm ile mahdûd hâriciyyede ulyâda sekiz bâb oda ve bir sofa ve dîvânhâne ve vustâda altı bâb oda ve dehlîz ve süflâda iki bâb sagīr oda ve bir ahır ve bi’r-i mâ ve havlu ve dâhiliyede ulyâda dört bâb ahşâbdan mebnî ve dört bâb kârgîr cem‘an sekiz bâb oda ve bir sofa ve bir köşk ve vustâda dört bâb oda ve süflâda üç bâb kârgîr oda ve bir kârgîr hamam ve iki kârgîr matbah ve bir mahtab ve bi’r-i mâ ve bir mikdâr bahçe ve iki aded köşk ve havluyu müştemil menzili zevce-i menkûham iken bundan akdem tarîk-i hacc-ı şerîfde müteveffiye olan Afîfe Hatun bt. Abdullah müceddeden mâlıyla binâ ve ba‘dehû bilâ-veled fevt olduğunda verâseti benim ile usûbet-i sebebiye cihetinden hâlâ serîr-i âlem-masîr-i sultânî ve taht-ı felek-rıf‘at-ı cihânbânî üzere sad-hezâr-ı şevket ve ikbâl-i bî-şümâr-ı sa‘âdet [ve] iclâl ile kâmurân olan sultan-ı selâtîn-i cihân ve hâkān-ı havâkīn-i zamân zıllullâhî fi’l-arzeyn kehfü’l-halâyık ecma‘în şehriyâr-ı sipihr-iktidâr-ı Hurşîd-fer şehinşâh-ı cihândâr-ı bülend-ahter müşeyyid-i bünyânü’s-saltanat bi-ref‘i’z-zulm ve’l-udvan müzeyyin-i serîrü’l-hilâfeti bi-neşri’l-adl ve’l-ihsân râfi‘-i râyât-ı adâlet ve ra‘iyyet-perveri câmi‘-i âyât-ı celâlet ve merhamet-güsteri vâlî-i livâ’ü’l-vilâ’? fi’l-âfâk mâlik-i serîrü’l-hilâfeti bi’l-istihkāk unvân-nâme-i cihânbânî tuğra-yı menşûr-ı kişver-sitânî el-müeyyed bi’l-avni’l-burhânî ve’t-te’bîdi’s-samedânî mümehhid-i esâs-ı saltanat mutarraz-ı libâs hilâfetü’s-sultani’l-a‘zam ve’l-hâkāni’l-ekrem es-sultan ibnü’s-sultan es-sultan Mahmud Hân ibnü’s-sultani’l-es‘ad ve’l-hâkāni’l-emcedi’l-merhûm ve’l-mağfûr ed-dâricü ilâ-medârici’l-meliki’l-gafûr es-sultan Mustafa Hân lâ-zâlet livâ’ü ma‘deletihî ilâ-yevmi’l-haşr mansûran ve mâ buriha bisâte saltanat ilâ-sa‘ati’n-nüşûr menşûren hazretlerine münhasıra olmağla menzil-i mezkûrun mülk olan mahallinin arsa ve binâ ve vakıf olan mahallinin ancak binâsının nısf-ı şâyi‘i sultan-ı müşârun-ileyh hazretleri taraf-ı âlîlerinden mevlânâ-yı müşârun-ileyh hazretlerine temlîk ve vakıf olan arsası dahi Cenderecizâde Muhyiddin Efendi ve Fâtıma bt. Firuz vakıfları taraflarından yine müşârun-ileyh hazretlerine îcâr olunmağla ben dahi kezâlik menzil-i mahdûd-ı mezkûrun irsen bana intikāl eden mülk olan mahallinin arsa ve binâsında ve vakıf olan mahallin ancak binâsında olan nısf hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin üç bin guruşa mevlânâ-yı müşârun-ileyh hazretlerine bi’l-verâse bey‘ [55a] ve temlîk ve teslîm eylediğimde onlar dahi ber-vech-i muharrer iştirâ ve temellük ve kabz ve kabûl buyurduklarından sonra semeni olan meblağ-ı mezbûr üç bin guruşu mevlânâ-yı müşârun-ileyh hazretleri bana def‘ ve teslîm ben dahi yed-i mükerremlerinden bi’t-tamam ve’l-kemâl ahz u kabz eyledim ba‘de’l-yevm sâlifü’z-zikr menzilin mecmû‘u şeyhülislâm müşârun-ileyh hazretlerinin hibeten ve şirâen ve istîcâren mülk-i mahzları ve vâsıl-ı havza-i tasarrufları olup benim kat‘â alâka ve medhalim kalmadı. Ber-vefk-i dilhân-ı devlet ve sa‘âdet ile keyfe mâ yeşâ ve hasbe-mâ yahtâr tasarruf buyursunlar dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Fahrü’l-müderrisîni’l-kirâm müfettiş-i Haremeyni’ş-şerîfeyn, umdetü’l-mevâliyyi’l-izâm Alemî Ahmed Efendi kādı-ı Mısır sâbıkā , umdetü’l-mevâliyyi’l-izâm Abdullah Efendi b. eş-Şeyh Mehmed Efendi emînü’l-fetvâ, fahrü’l-müderrisîni’l-kirâm Osman Efendi b. el-merhûm Ebûbekir Efendi, fahrü’l-müderrisîni’l-kirâm Mehmed Efendi b. el-merhûm Mahmud Efendi emîn-i fetvâ sâbıkā , fahrü’l-müderrisîni’l-kirâm Hüseyin Efendi, Kādızâde Mustafa Efendi b. Hasan Efendi, Ahmed Efendi b. Mahmud Efendi imâm-ı Câmi‘-i Molla Gürânî, Süleyman Efendi b. Hasan, Ahmed Efendi b. Hayâlizâde, imâm-ı hazret-i veliyyü’n-ni‘am, el-Hâc Ahmed b. Hüseyin, es-Seyyid Mustafa b. es-Seyyid Süleyman, Ahmed Odabaşı b. Muslu, Üsküdarî Mehmed Efendi b. Mehmed.