Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 264 Hüküm no: 251 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşandığı kocası Mehmed b. Ali’den mehr-i müeccelini alamadığını eden Ayşe bt. Ali’nin davasında haksız olduğu Mahmiye-i İstanbul’da Atpazarı kurbünde Manisalı Çelebi Mahallesi’nde sâkine Âişe bt. Ali nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i sâbıkı işbu bâ‘isü’l-kitâb Mehmed b. Ali nâm kimesne mahzarında üzerine da‘vâ ve takrîr-i kelâm edip mezbûr Mehmed zevcim olup târih-i kitâbdan yirmi ay mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan dört bin akçe mehr-i müeccelim zimmetinde kalmağla mezbûr Mehmed’e suâl olunup meblağ-ı mezbûru bana edâ ve teslîme tenbîh olunması matlûbumdur dedikde gıbbe’s-suâl mezbûr Mehmed cevâbında fi’l-hakīka müdde‘iyye-i mezbûre sâbıkā zevcesi olup bâyinen tatlîk eylediğini ve zimmetinde ancak bin beş yüz akçe mehr-i müecceli olduğunu ikrâr ziyâdeyi ba‘de’l-inkâr meblağ-ı mezbûr bin beş yüz akçe ve nafaka-i iddet ve meûnet-i süknâsi’çün bi’t-terâzî ta‘yîn olunan iki yüz yetmiş akçe ki cem‘an bin yedi yüz yetmiş akçeyi müdde‘iyye-i mezbûreye târih-i merkūmda tamamen edâ ve teslîm etmişidim deyü def‘le mukābele edicek gıbbe’l-istintak ve’l-inkâr mezbûr Mehmed’den def‘-i mezkûruna mutâbık beyyine taleb olundukda udûl-i ahrâr-ı ricâl-i Müslimînden olup medîne-i Üsküdar mahallâtından Hasanağa Mahallesi ahâlîsinden Mehmed b. Mustafa ve Hüseyin Odabaşı b. İbrahim nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mehmed işbu müdde‘iyye-i mezbûreyi târih-i mezbûrda bâyinen tatlîk eylediğinde bin beş yüz akçe mehr-i müecceli ile nafaka-i iddet ve meûnet-i süknâsı için ta‘yîn olunan iki yüz yetmiş akçe ki cem‘an bin yedi yüz yetmiş akçeyi müdde‘iyye-i mezbûreye bizim huzûrumuzda tamamen edâ ve teslîm eyledi biz bu husûsa bu vech üzere şâhidleriz şehâdet dahi ederiz deyü her bir edâ-yı şehâdet-i şer‘iyye eyledikde ba‘de’t-ta‘dîl ve’t-tezkiye şehâdetleri makbûle oldukdan sonra müdde‘iyye-i mezbûreden ziyâde müdde‘âsı olan iki bin beş yüz akçe için beyyine taleb olundukda ityân-ı [54b] beyyineden izhâr-ı acz ile istihlâf etmeğin mezbûr Mehmed’e yemîn teklîf olundukda ol dahi alâ-vefkı’l-mesûl yemîn bi’llâhi’l-aliyyi’l-a‘lâ etmeğin mûcebince müdde‘iyye-i mezbûre Âişe bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fî 24 Cumâdelâhire sene [1]143. Şuhûdü’l-hâl: Hüseyin Çavuş el-mübâşir, Kasım b. Mehmed, Kādızâde İbrahim Çelebi, Abdullah b. Mustafa, Mehmed Çelebi b. Abdullah.