Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 268 Hüküm no: 255 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesi Ümmügülsüm bt. el-Hâc Mustafa’nın yanında olan Hibetullah’a nafaka bağlanması Nafaka. Mahmiye-i İstanbul’da Arabacı Bayezid Mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü’l-vesîka Ümmügülsüm bt. el-Hâc Mustafa nâm hatun meclis-i şer‘-i şerîf-i enverde takrîr-i kelâm ve tâ‘bir ani’l-merâm edip zevcim gāib ani’l-beled es-Seyyid Mustafa b. es-Seyyid Ahmed Efendi’nin firâşından hâsıla ve benden mütevellide hâlâ hacr ve terbiyemde olup işbu sagīre Hidayetullah’ın mâlı olmayıp nafaka ve kisveye eşedd-i ihtiyâcı olmağla babası zevcim gāib-i mezbûr üzerine kıbel-i şer‘den kadr-i ma‘rûf nafaka-bahâ farz ve takdîr olunmak matlûbumdur dedikde hakīkat-ı hâl mezbûrenin bâlâda takrîr ve beyân eylediği vech üzere olup meblağ-ı âti’z-zikr dahi kadr-i ma‘rûf idiğini zeyl-i vesîkada muharrerü’l-esâmî Müslimîn ihbâr etmeğin hâkim-i muvakki‘-ı sadr-ı kitâb -tûbâ-lehû ve hüsnü meâb- hazretleri sagīre-i mezbûre Hidayetullah’ın nafaka ve kisvesi’çün babası gāib-i mezbûr es-Seyyid Mustafa üzerine târih-i kitâbdan yevmî üç para farz ve takdîr buyurup meblağ-ı mefrûz-ı mezkûru sagīre-i mezbûre Hidayetullah’ın nafaka ve kisve ve sâir levâzım-ı zarûriyyesi’çün harc ve sarfa ve lede’l-iktizâ istidâneye ve hîn-i zaferde babası mezbûr es-Seyyid Mustafa üzerine rücû‘a mezbûre Ümmügülsüm Hatun’a izin-birle mâ-hüve’l-vâki‘ bi’t-taleb ketb olundu. Fî 24 Cumâdelâhire sene [1]143. Şuhûdü’l-hâl: Abdülbâki b. Mustafa, Hasan Beşe b. Abdullah, el-Hâc Mehmed b. Himmet, Ahmed b. Mustafa, İbrahim b. Mustafa, Mehmed b. Abdullah, Ahmed b. Şa‘ban.