Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 460 Hüküm no: 861 Orijinal metin no: [82b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Korucu Kethüdâ b. Abdurrahman’dan oğluna kalan zeamet mahsûlünün oğlunun ölümü üzerine annesi ve kızkardeşine teslim edildiği Mahrûse-i Üsküdar sâkinlerinden olup vefât eden merhûm-ı mebrûr el-vâsıl ilâ rahmeti rabbihi’l-gafûr Korucu Kethüdâ b. Abdurrahman’ın sagīr oğlu olup hâlâ vefât eden Mehmed Bey’e kıbel-i şer‘den vasî olan Ahmed Halîfe b. İlyas mahfil-i kazâya gelip müşârunileyh Mehmed Bey’in mutasarrıf olduğu ze‘âmetin iki senedir ki mahsûlünden ba‘zı re‘âyâ zimmetinde ve ba‘zı der anbar olmağın zikr olunan mahsûlü kabz ve îsâl için vâlidesi fahrü’l-muhadderât tâcü’l-mestûrât Belkıs Hâtun bt. Abdullah, Abdurrahim ve hemşîresi İsmihân bt. Korucu Kethüdâ beni vekîl edip teveccüh lâzım geldikde sâbıkan vesâyetim hasebiyle ber mûceb-i defter kabz eylediğim sagīr-i mezbûrun esbâb ve erzâkını mezbûretân hâtunlar müteveffâ-yı merkūmun vârisi olmağın teslîm eyledim hâlâ kıbel-i şer‘den adam ta‘yîn olunup mezbûretân hâtunların takrîrleri vukû‘ı üzre tahrîr olunmasın taleb ederim dedikde zeyl-i kitâbda ismi mastûr olan Müslümanlar ile mahkeme kâtibi Mevlânâ Mehmed irsâl olunup vardıklarında mezbûretân Belkıs ve İsmihân ikrâr ve takrîr-i kelâm edip merkūm Ahmed Halîfe’nin vesâyeti hasebiyle kabz eylediği emvâl ve erzâkı nefîr-i kıtmîr ve kalîl ve kesîr alıp kabz eyledik mezbûrun zimmetinde bir habbe bâkī kalmadı dediklerini mevlânâ-yı merkūm haber vermeğin bu hurûf ketb u tahrîr olundu. Fi’t-târihi’l-mezbûr. Şuhûdü’l-hâl: Mevlânâ Mahmud Halîfe [b.] İlyas el-imâm, Hüseyin b. Veli, Ahmed b. İbrahim, Mehmed b. Hasan el-müezzin, Mahmud b. Halil, Osman b. Bekir, Mehmed b. Hasan, Piyâle [b.] Abdullah ve gayruhüm