Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 466 Hüküm no: 875 Orijinal metin no: [84a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhad b. Abdullah’ı, Mehmed Paşa’nın âzat ettiği Udûl ve sikātdan Hasan Bey b. Abdullah ve Mustafa Çelebi b. el-Hâc Kasım nâm kimesneler mahfil-i kazâda mahrûse-i Üsküdar’da subaşı ve zâbitü’l-umerâ ve kıdvetü’l-emâsil ve’l-akrân Müstedâm Bey b. Abdurrahman mahzarında edâ-yı şehâdet-i şer‘iyye edip bâ‘isü’l-kitâb orta boylu ön dişleri seyrek kara gözlü yüzünün sağ yanında serv-i şekl eser-i cerâhatli ve sol yanında üç yerde eser-i cerâhatli ve sol kolunda üç yerde dâğı olan Şekreviyyü’l-asl işbu Ferhad b. Abdullah nâm Arab Tavâşîyi sâbıkan Basra Beylerbeyisi olup vefât eden emîrü’l-ümerâi’l-kirâm kebîrü’l-küberâi’l-fihâm merhûm-ı mebrûr el-vâsıl ilâ rahmeti rabbihi’l-gafûr Mehmed Paşa hazretleri hâl-i hayâtında ve kemâl-i nefâz-ı tasarrufât-ı akliyyesinde mülkünden âzâd edip mezbûru sâirü’l-ahrâr-ı asliyyîn gibi biliriz bu husûsa şâhidleriz şehâdet ederiz dediklerinde ba‘de’t-ta‘dîl hayyiz-i kabûlde vâki‘ olup mezbûrun ıtkına hükm olundukdan sonra mâ vaka‘a bi’t-taleb tahrîr olundu. Fî evâsıtı Muharremi’l-harâm li sene ihdâ ve elf. Şuhûdü’l-hâl: Yusuf Çelebi [b.] Budak, Hamza Subaşı an zümre-i yayabaşıyân-ı hâssa, Muttalib [b.] Süleyman, Hasan b. Sâdık, Mehmed b. Behrâm ve gayruhüm