Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 468 Hüküm no: 879 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erkiro bt. Manol’un annesinden kalan ev hissesinin yarısını istemesi Budur ki Kadıköyü nâm karye sâkinelerinden Erkiro bt. Manol nâm hâtun mahfil-i kazâda karye-i mezbûrenin zâbiti olan Mahmud [b.] Sofu tarafından vekîl olup vekâleti nehc-i şer‘î üzre sâbite olan Mustafa [b.] Yusuf el-kâtib mahzarında takrîr-i da‘vâ edip karye-i mezbûrede vefât edip zâhirde vârisi olmayıp metrûken vakfa deyni olan Yani zimmînin karye-i mezbûrede vâki‘ bir tarafı Dimitri mülkü ile ve bir tarafı Toma Öksüz mülkü ile ve bir tarafı diğer Dimitri evi ile mahdûd olan evin nısfı anamdan bana intikāl eylemişdir taleb ederim dedikde gıbbe’s-suâl mezbûr Mustafa fi’l-hakīka zikr olunan evin nısfı mezbûrenin olup ve mezbûre hâl-i hayâtında iki bin yüz akçeye bey‘ edip yedine hüccet dahi vermişdir bu husûsa şâhidlerim vardır dedikde zeyl-i hüccetde mastûr olan Malkoç Bey el-bevvâb-ı sultânî ve Ali Bey er-râcil ve zimmîlerden Yorgi Midilli ve Yorgi Makriyan nâm kimesneler fi’l-hakīka mezbûre Erkiro zikr olunan akçeyi nısf hissesin mürd-i mezbûra iki bin yüz akçeye bey‘ eyledi bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mezbûre zimmî mu‘ârazadan men‘ olunup ve mâ hüve’l-vâki‘ bi’t-taleb tahrîr olundu. Fi’t-târihi’l-mezbûr. Şuhûdü’l-hâl: Mahmud Bey er-râcil, el-Hâc Hüseyin [b.] Mustafa, Ahmed Bey el-cündî, Mehmed b. Behrâm ve gayruhüm