Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 469 Hüküm no: 880 Orijinal metin no: [84b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Selîm Hân Vakfı’na, borçlu ölen Yani’nin evinin satılıp borcun tahsil edildiği Merhûm Sultân Selîm Hân -tâbe serâhu- hazretlerinin evkāfından Kadıköy nâm karye zâbiti olan Mahmud [b.] Sofu tarafından vekîl-i şer‘î olan Mustafa b. Yusuf el-kâtib mahfil-i kazâda karye-i mezbûre sâkinlerinden bâ‘isü’l-hurûf Dimitri Karaca nâm zimmî mahzarında takrîr-i kelâm edip bundan akdem karye-i mezbûreden olup mürd oldukda zâhirde vârisi olmayıp metrûkâtı beytülmâle âid ve râci‘ olan Yani nâm zimmînin karye-i mezbûrede vâki‘ inde’l-ahâlî ma‘lûmü’l-hudûd mülk evini sûk-ı sultânîde beyne’t-tâlibîn müzâyede edip rağbet-i nâs münkatı‘a oldukdan sonra mezbûr Dimitri’nin üzerinde altı bin üç yüz akçeye karâr edip ziyâdeye tâlib olmamağın mezbûr zimmîye altı bin üç yüz akçeye bey‘ edip teslîm-i mebî‘ ve semen-i mezbûru vakf-ı mezbûr için bi’t-tamâm alıp kabz eyledim bir akçe ve bir habbe bâkī kalmadı dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikde mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: El-Hâc Murad Halîfe el-hatîb, Ahmed Bey el-cündî, İlyas Bey el-cündî, el-Hâc Hüseyin [b.] Mustafa, Mehmed Bey [b.] Behrâm ve gayruhüm