Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 477 Hüküm no: 899 Orijinal metin no: [86a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Server Hâtun bt. Abdullah’ın, evini Hasan b. Timurhan’a sattığı Mahrûse-i Üsküdar’da Torbalı mahallesinden Server Hâtun bt. Abdullah mahfil-i kazâda işbu hâmilü’l-kitâb Hasan b. Timurhan mahzarında ikrâr ve i‘tirâf edip mahalle-i mezbûrede Hüseyin b. Abdullah ve İskender b. Abdullah ve mezbûr Hasan mülkleriyle ve tarîk-i âmla mahdûd olup iki bâb evi ve bir dükkânı ve hayâtı ve eşcâr-ı müsmireyi müştemil olan mülk menzilimi altı bin nakid akçeye bey‘-i bâtla bey‘ edip kabz-ı semen ve teslîm-i mebî‘ kıldım dedikde mukırra-i mezbûrenin vech-i meşrûh üzre vâki‘ olan ikrârını mukarrun lehü’l-mezbûr vicâhen ve şifâhen tasdîk ve tahkīk eylediği bi’t-taleb kayd olundu. Şuhûdü’l-hâl: El-Hâc Mehmed b. Ahmed, Mustafa b. Fazlı, Ahmed Çelebi b. Budak, İsmail b. Abdullah, el-Hâc Sinan b. Abdullah ve gayruhüm