Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 477 Hüküm no: 900 Orijinal metin no: [86a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İsa Halîfe’nin yetimlerinin, Abdurrahman’daki evden hisse taleplerinin reddedildiği Hasan Ağa mahallesinden olup bundan akdem vefât eden İsa Halîfe’nin eytâmına kıbel-i şer‘den vasî olan Hümâ Hâtun bt. Abdullah ve kebîr oğlu Mehmed b. İsa Halîfe mahfil-i kazâda merhûm-ı mezbûrun diğer oğlu Abdurrahman mahzarında takrîr-i merâm edip mahalle-i mezbûrede tarîk-i âmla ve İsa Dede ve Ramazan ve Kurd b. Hamza mülkleriyle mahdûd olan menzilde bizim de hisse-i şer‘iyyemiz vardır taleb eyleriz dediklerinde gıbbe’s-suâl mezbûr Abdurrahman cevâb verip babamız vefât eyledikde zarûret-i deyni için bey‘ olunmak lâzım gelip nice müddet sûk-ı sultânîde müzâyede olup beş bin akçede vâlidem Fâtıma bt. Tâceddin üzerinde karâr edip aldıkda ol dahi vefât edip bana intikāl eyledi deyu sâbıkan Üsküdar kassâmı olan Nasûh Halîfe imzâsıyla mümzâ ve hâtemiyle mahtûm sene semân ve semânîn ve tis‘a-mi’e Saferi’nin evâili târih-i ile müverrah bir kıt‘a hüccet-i şer‘iyye ibrâz edip vakıfdan hüccete İsa Dede b. Mustafa ve Mustafa Dede b. Mustafa ve Müstecâb b. Mustafa nâm kimesneler şehâdet eyleyip şehâdetleri hayyiz-i kabûlde vâki‘ oldukdan sonra müdde‘iyyân-ı mezbûrân da‘vâ-yı mezbûreden men‘ olundukda mâ vaka‘a bi’t-taleb kayd olundu. Şuhûdü’l-hâl: Hasan b. Sâdık, Mestci Mehmed b. Sinan, Bâkī Hoca b. Pîr Kadem, Şemseddin [b.] Sâdık ve Ahmed b. Mustafa ve gayruhüm Yevmü’l-Cum‘a fî 23 Muharremi’l-harâm li sene ihdâ ve elf