Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 480 Hüküm no: 907 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Paşa hazretleri vakfı’na ait kayıkların durduğu yerin Mehmed Çelebi b. İbrahim’e kiraya verildiği Mahrûse-i Üsküdar sâkinlerinden olup hâlâ Vâlide Sultân -tâbe serâhâ- hazretlerinin hamam-ı çiftelerinde hamamcı olan kıdvetü’l-emâsil Mehmed Çelebi b. İbrahim mahfil-i kazâya gelip merhûm-ı mebrûr el-vâsıl ilâ Rabbihi’l-Gafûr el-Hâc Paşa hazretlerinin evkāfına bi’l-fi‘l mütevellî olan fahrü’l-emâsil ve’l-a‘yân Cemşid Kethüdâ b. Abdurrahman nâm kimesnenin imzâsıyla mümzâ ve hâtemi ile mahtûm tezkire ibrâz edip mazmûnunda merhûm-ı merkūmun donanma kayıkları durduğu kayıkhânesinin kurbunda bâzâra bedel kayık durduğu yer ile bir tarafı merhûme Mihrimah Sultan İskelesi’ne ve bir tarafı deryâya ve bir tarafı vâkıf-ı merhûm kayıkhânesine ve fevkānî odalarına ve bir tarafı kaldırıma müntehî olan yerleri merkūm Mehmed Çelebi’den vakf-ı merkūm için icâre-i mu‘accele beş bin akçesin alıp kabz eylediğinden sonra yevmî ikişer akçe icâreye verip mâh be-mâh ta‘yîn olunan yevmî ikişer akçeyi vakf-ı mezbûr için edâ ettikden sonra tasarrufuna mâni‘ olmaya mastûr ve mukayyed ve kıbel-i şer‘den temessük taleb etmeğin bu hurûf ketb olundu. Tahrîren fî evâhiri Muharremi’l-harâm. Şuhûdü’l-hâl: Müstedâm, Mehmed Bey [b.] Behrâm, Fahrü’l-müderrisîn Hasan Çelebi, Fahrü’l-müderrisîn Mehmed Çelebi Yevmü’s-sülesâ fî 29 Muharrem