Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 481 Hüküm no: 909 Orijinal metin no: [87a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hüsrev b. Abdullah’ın terk ettiği eşi Ayşe bt. Seyyid Hüseyin’in beş aylık canlı çocuk doğurduğu Oldur ki Bundan akdem vefât eden Hüsrev b. Abdullah nâm kimesnenin zevce-i metrûkesi Ayşe bt. Seyyid Hüseyin nâm hâtun tarafından da‘vâ ve kabz ve îsâle vekîl olup vekâleti nehc-i şer‘î üzre sâbite olan Ahmed Halîfe b. Şeyh Mehmed mahfil-i kazâda müteveffâ-yı merkūmun vâlidesi Hasnâ bt. Abdullah nâm hâtun tarafından husûs-ı âtîde muhâsamaya vekîl-i şer‘î olup vekâleti nehc-i şer‘î üzre sâbite olan Mehmed b. Karagöz mahzarında ve mahrûse-i Üsküdar’da subaşı ve emîn-i beytülmâl olan fahrü’l-akrân Müstedâm Bey b. Abdülmennân huzûrunda takrîr-i da‘vâ edip müvekkilem mezbûre Ayşe zevci merkūm Hüsrev vefât ettikden sonra sene elf Zilhiccesi’nin yirmi dokuzuncu gün vaz‘-ı haml edip canlı beş aylık bir oğlan dünyaya gelip yine vefât etti ol takdîrce oğlana değen hissemiz farzefn ve redden vâlidesi müvekkilem mezbûre Ayşe’ye intikāl edeni taleb ederim dedikde mezbûr Mehmed mezbûre Ayşe zevci vefât ettikden sonra canlı oğlan olduğunu beyân etsin dedikde kābili olan Şekernaz bt. Abdullah ve komşusu olan Narani bt. Abdullah nâm hâtunlar fi’l-hakīka mezbûre Ayşe’ye zevci merkūm Hüsrev’in vefâtı haberi geldikden sonra mübârek Zilhicce’nin yirmi dokuzuncu gün canlı beş aylık bir oğlu olup ba‘dehû vefât etti bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra vekîl-i mezbûr Mehmed müvekkilem mezbûre Hasnâ oğlum sefere gittikde mezbûre Ayşe hâmile olup mübârek Zilhicce’nin yirmi dokuzuncu günü canlı oğlu oldu yine vefât etti dediler benim gözüm görmez lâkin bana da ilm geldi dedi deyu ikrâr edicek mâ vaka‘a kayd olundu. Şuhûdü’l-hâl: Hüseyin b. Hüseyin, el-Hâc Hüseyin [b.] Mustafa, Hayran b. Abdi, Hasan b. Sâdık, Şaban b. Pîrî, Kirişçi Mehmed b. Ömer, Ferhad b. ( )