Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 277 Hüküm no: 266 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf evin tasarrufu konusunda Mehmed Efendi b. Süleyman’in vereseleri ile İsmail Efendi b. Veliyüddin Efendi’nin anlaştığı Mahmiye-i İstanbul’da Âşıkpaşa Mahallesi’nde sâkin iken bundan akdem vefât eden Mehmed Efendi b. Süleyman b. Ömer’in verâseti zevce-i menkûha-i metrûkesi Şerife Ümmügülsüm bt. es-Seyyid Habib nâm hatun ile usûbet-i nesebiye cihetinden li-ebeveyn er karındaşı oğlu Abdulkādir Çelebi b. Mustafa’ya münhasıra oldukdan sonra zâtı ta‘rîf-i şer‘î ile mu‘arrefe olan mezbûre Ümmügülsüm ile merkūm Abdulkādir meclis-i şer‘-i hatîr-i lâzımü’t-tevkīrde zikri âtî vakıf menzile tevcîh-i hâkimü’ş-şer‘le mutasarrıf olan işbu hâfızü’l-kitâb umdetü’l-müderrisîni’l-kirâm İsmail Efendi b. Veliyüddin Efendi nâm kimesne mahzarında her biri ikrâr-ı tâm ve takrîr-i kelâm edip mahalle-i mezbûrede vâki‘ süknâsı ulemâya meşrûta olup bir tarafdan Kettânî el-Hâc Mahmud mülkü ve bir tarafdan Mukābeleci el-Hâc Hüseyin Ağa mülkü ve bir tarafdan Attâr Ömer Çelebi mülkü ve bir tarafdan tarîk-i hâs ile mahdûd büyût-ı adîdeyi müştemil vakıf menzil mûrisimiz Mehmed Efendi’nin hayâtında tevcîh-i hâkimü’ş-şer‘le tasarrufunda iken ber-mûceb-i hüccet-i keşf ebniyesine mülkü olmak üzere altmış yedi bin akçe masrûfu olup fevt oldukda ebniye-i mezkûre bizlere intikāl etmişdir deyü da‘vâ sadedinde olduğumuzda beynimize muslihûn tavassut edip da‘vâ-yı mezkûremizden bizi mûmâ-ileyh İsmail Efendi ile yüz elli guruş üzerine inşâ-i akd-i sulh ettiklerinde bizler dahi sulh-ı mezbûru kabûl ve bedel-i sulh olan meblağ-ı mezbûr yüz elli guruşu müşârun-ileyh İsmail Efendi yedinden bi-kadri’l-hısas tamamen ahz u kabz eylediğimizden sonra ebniye-i mezkûreye müte‘allika âmme-i de‘âvî ve kâffe-i mütâlebât ve eymân-ı muhâsamâtdan mûmâ-ileyh İsmail Efendi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledik mûmâ-ileyh İsmail Efendi dahi bize bedel-i sulh deyü medfû‘u olan meblağ-ı mezbûr yüz elli guruşa müte‘allika âmme-i da‘vâdan zimmetimizi ibrâ-i âm ile ibrâ ve iskāt eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Cumâdelâhire sene [1]143. Şuhûdü’l-hâl: Mehmed Efendi b. İbrahim Efendi, Hüseyin Efendi b. Mehmed, es-Seyyid İbrahim b. es-Seyyid Ömer, Mehmed Çelebi b. Ömer, Hamid Çelebi b. Fazlullah, İsmail Çelebi b. Hüseyin.