Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 276 Hüküm no: 265 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Kirko’un ölen Serkis v. Mıgırdıç v. Nikogos’a olan borcunu vârislerine ödemesine tenbih olunması Vilâyet-i Anadolu’da vâki‘ Dârü’s-sa‘âdeti’ş-şerîfe ağası hâssı Göden kasabasında Ermeni Mahallesi ahâlîsinden olup medîne-i Trabzon’da yeni hânda ticâret vechi üzere sâkin iken bundan akdem hâlik olan Serkis v. Mıgırdıç v. Nikogos’un li-ebeveyn er karındaşları olduğunu iddi‘â eden bâ‘isiyyü’s-sifr Agop ve ( ) nâm Ermeniler meclis-i şer‘-i şerîf-i enverde Bogos v. Kirko nâm zimmî muvâcehesinde her biri üzerine da‘vâ ve takrîr-i kelâm edip hâlik-i mezbûr Serkiz bizim li-ebeveyn er karındaşımız olup babamız adı mezbûr Mıgırdıç ve dedemiz adı mezbûr Nikogos ve anamız adı Maryem b. Agop ve maskat-ı re’simiz zikrolunan Ermeni Mahallesi’dir hâlik-i mezbûrun verâseti usûbet-i nesebiye cihetinden bize münhasıra olup bizden gayrı vârisi ve terekesine müstahik âharı olmadığı ecilden hâlik-i mezbûrun merkūm Bogos zimmetinde cihet-i karzdan yirmi guruş hakkı olmağla kable’l-ahz hâlik ve meblağ-ı mezkûr bize intikāl etmeğin hâlâ mezbûr Bogos’a suâl olunup meblağ-ı mezbûru ber-vech-i muharrer bize edâ ve teslîme tenbîh olunması matlûbumuzdur dediklerinde gıbbe’s-suâl mezbûr Bogos cevâbında hâlik-i [57b] mezbûra cihet-i karzdan yirmi guruş zimmetinde edâsı lâzım deyni olduğunu ikrâr lâkin müdde‘iyân-ı mezbûrân ber-vech-i muharrer vâris olduklarını inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda udûl-i Müslimînden ve fi’l-asl kasaba-i mezkûre ahâlîsinden olup mahmiye-i İstanbul’da Akbıyık Mahallesi’nde müsâfiren sâkin Osman b. Ali ve Ebûbekir b. el-Hâc Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iyân-ı mezbûrân Agop ve Nikogos hâlik-i mezbûr Serkiz ile li-ebeveyn karındaşlar olup babaları adı mezbûr Mıgırdıç ve dedeleri adı merkūm Nikogos ve anaları adı Maryem bt. Agop ve maskat-ı re’sleri zikrolunan Ermeni Mahallesi’dir hâlik-i mezbûrun verâseti işbu merkūmâna münhasıra olup bunlardan gayrı vâris ve terekesine müstahik âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cumâdelâhire sene [1]143. Şuhûdü’l-hâl: Mehmed Çelebi b. Abdullah, Kādızâde İbrahim Çelebi b. Mustafa, Ahmed b. Şa‘ban, Ya‘kub b. Abdullah, Mustafa b. Hasan.