Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 278 Hüküm no: 268 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Halil Efendi b. el-Hâc Ali’nin Abdisubaşı Mahallesi’ndeki evdeki hissesini el-Hâc Ali b. Yusuf ve ortağı Kostanti v. Aslan’a sattığı Hilâl-i sutûrda vâki‘ husûsu mahallinde ketb ü tahrîri’çün bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yusuf Efendi sâbıkā Matbah-ı âmire ve cizye muhâsebecisi olan umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam sa‘âdetlü semâhatlü ebü’l-mekârim el-Hâc Halil Efendi b. el-merhûm el-Hâc Ali’nin mahmiye-i İstanbul’da Âşıkpaşa Mahallesi’nde vâki‘ sa‘âdet-hânelerine varıp zeyl-i sahîfede mektûbü’l-esâmî Müslimîn huzûrlarında akd-i meclis-i şer‘-i şerîf eyledikde müşârun-ileyh el-Hâc Halil Efendi meclis-i ma‘kūd-ı mezkûrda bâ‘isiyyü’l-vesîka el-Hâc Ali b. Yusuf ve şerîki Kostanti v. Aslan muvâcehelerinde ikrâr-ı tâm ve takrîr-i kelâm edip mahmiye-i mezbûrede Fenerkapısı dâhilinde Abdisubaşı Mahallesi’nde vâki‘ bir tarafdan Yazıcı Firine v. İspandoni ve bir tarafdan Kürkçü Tanaş nâm zimmîler mülkleri ve bir tarafdan tarîk-i hâs ve bir tarafdan tarîk-i âm ile mahdûd fevkānî üç bâb oda ve bir sofa ve iki dehlîz ve bir kilâr ve iki tahtânî oda ve bir matbah ve bi’r-i mâ ve bir mikdâr bahçeyi muhtevî mülk menzilin nısf-ı şâyi‘i akd-i âti’z-zikrin sudûruna değin yedimde mülk ve hakkım ve nısf-ı şâyi‘-i âharı gāib ani’l-beled Totoraki v. Hekîm Manol zimmînin yedinde mülk ve hakkı olmağın ber-vech-i muharrer yedimde mülk ve hakkım olan mârru’z-zikr nısf şâyi‘i bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin üç yüz guruşa mezbûrân el-Hâc Ali ve Kostanti’ye ale’l-iştirâki’s-seviyy bey‘ ve temlîk ve semen-i mezbûru mukaddemâ yedlerinden iştirâ ve kabz eylediğim kereste bahâsından kendilere zimmetimde deynim olan iki bin üç yüz guruşa takās ve mahsûb eylediğimde onlar dahi ber-minvâl iştirâ ve temellük ve mukāssa ve kabûl eylediler min-ba‘d menzil-i mahdûd-ı mezkûrun nısf-ı şâyi‘i mezbûrân el-Hâc Ali ve Kostanti’nin mülk-i müşterâları olup kat‘â benim alâka ve medhalim kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Hasan Çelebi b. Mustafa ve Osman b. Mehmed ile meclis-i şer‘a gelip her biri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Fahrü’l-müderrisîni’l-kirâm Mustafa Efendi el-müfettiş-i Haremeyni’ş-şerîfeyn hâlâ, zübdetü erbâbi’t-tahrîr ve’l-kalem Münci Efendi, Mehmed Ağa b. Mustafa, el-Hâc Ömer Ağa b. Ali ve Çukadâr Osman Bey b. Mehmed.