Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 279 Hüküm no: 269 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Mehmed’in Beykoz’daki evini Dergâh-ı âlî kapıcıbaşılarından İsmail Ağa b. Mehmed Efendi’ye istiğlal yoluyla sattığı Vilâyet-i Anadolu’da Yoros kazâsına tâbi‘ Beykoz kasabasında sâkin Hasan Ağa b. Mehmed meclis-i şer‘-i hatîr-i lâzımü’t-tevkīrde Dergâh-ı âlî kapıcıbaşılarından umdetü erbâbi’l-mekârim İsmail Ağa b. Mehmed Efendi tarafından zikri âtî husûsu tasdîka vekîl olduğu Yahya Çelebi b. Süleyman ve İbrahim b. Receb şehâdetleriyle vekâleti sâbit olan Mustafa Çelebi b. Ahmed mahzarında ikrâr ve takrîr-i kelâm edip silk-i mülk-i sahîhimde münselik olup kasaba-i mezbûrede vâki‘ üç tarafdan sâhil-i bahr ve bir tarafdan tarîk-i âm ile mahdûd hâriciyyede fevkānî bir köşk ve bir sofa ve tahtânî bir bâb oda ve kenîf ve matbah ve hamam ve kârgîr su mahzeni ve havuz ve havlu ve dâhiliyede fevkānî iki bâb oda ve iki sofa ve tahtânî bir bâb oda ve kenîf ve havlu ve hudûd-ı mezkûr ile mahdûd başka kapılı iki bâb oda ve kireçhâne ve kayıkhâneyi müştemil yalı tâ‘bir olunur menzilim ile yine kasaba-i mezbûre kurbünde vâki‘ ma‘lûmü’l-hudûd ve’l-müştemilât çiftlik tâ‘bir olunur menzil ve bahçemi müvekkil-i mûmâ-ileyh İsmail Ağa’ya bi-tarîkı’l-istiğlâl sekiz yüz guruşa bey‘ ve teslîm ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr sekiz yüz guruşu müvekkil-i mûmâ-ileyh İsmail Ağa yedinden tamamen ahz u kabz eylediğimden sonra müvekkil-i mûmâ-ileyh dahi menzil-i mahdûd-ı mezkûr ile çiftlik-i mahdûd-ı mezkûru ba‘de’t-tahliyye ve’t-tekābuz târih-i kitâbdan bir sene tamamına değin yüz altmış guruşa bana îcâr ve teslîm ve kabûl eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Receb sene [1]143. Şuhûdü’l-hâl: El-hâc Mehmed b. Hüseyin, Abdullah b. İbrahim, Molla İbrahim b. Abdullah, Mehmed Efendi b. Hacı Ahmed, Mustafa Bey b. Hasan, Süleyman b. Abdullah, Mehmed Çelebi b. Ahmed.