Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 515 Hüküm no: 1014 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Suyolu memlahası mültezimlerinin tuzları satılmadan İstanbul, Galata, Hâslar ve Üsküdar’da tuz satılmaması, satılacaksa mültezimlerin buna nezaret etmeleri Efâzilü’l-kuzât ve’l-müslimîn e‘âzımü’l-vülât ve’l-muvahhidîn yenâbi‘ü’l-fezâi’li ve’l-yakīn huccetü’l-hakkı ale’l-halki ecma‘în vârisûnü’l-ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul ve Galata ve Hâslar ve Üsküdar kadıları -dâmet fezâ’iluhum- tevkî‘-i refî‘-i hümâyûn vâsıl olıcak ma‘lûm ola ki hâliyâ Suyolu Memlehası mültezimleri olan Mihail ve Yorgi ve Duka ve Manol nâm zimmîler Dergâh-ı mu‘allâm’a gelip uhdemizde olan mukāta‘ayı iltizâm ettiğimizde tuz[a] ziyâde müzâyaka var iken İstanbul’a kifâyet edicek tuzu yetiştirip tuza min-ba‘d müzâyaka çektirmemek üzere mukāta‘a-yı mezbûrenin altı yıllık yüz yirmi yük akçeye iltizâm edip ve ber vech-i peşîn Hazîne-i âmireye on iki yük akçe teslîm edip gece ve gündüz şartı mûcebince İstanbul zahîresiçin çalışıp hizmetimizde kusûrumuz olmadığından gayrı şart-ı iltizâmımızda tuz anbarından gayrı yerde tuz füruht olunmaya eğer bizim ma‘rifetimiz yokken tuz füruht olunursa girift oluna deyu dâhil olup ve mâ-tekaddemden dahi bu üslûb üzre zabt olunurken hâlâ ba‘zı kimesneler âhar vilâyetlerden tuz getirip kimisi ekābir koltuğuna girip ve kimi dükkân ve mahzenlerde ve kimi dahi iskele yanlarında hufyeten tuz füruht etmeyeler öyle tuz zâyi‘ olduğundan gayrı uhdemizde olan mukāta‘aya dahi envâ‘-ı zarar olmuşdur veyâhud şimdiye değin âhar vilâyetlerden gelen tuzlar anbarda mîrî tuz var iken eminler ma‘rifetiyle bir yere der-mahzen olup tâ mîrî tuz satılmayınca füruht olunmazdı şimdi ol makūle tuz kendi ziyâde mu‘tâd-ı kadîme muhâlif te‘allül edip getirdikleri tuzu yalnız veyâhud biz satarız siz resminizi alınız deyu nizâ‘ ederler ve ekābir kulu cebren satıp bize zulm ve mâl-ı mîrîye gadr ederler öyle olsa min-ba‘d şart-ı iltizâmımız ri‘âyet olunup mîrî anbarda tuz var iken tuz getirenlerin tuzu bizim ma‘rifetimizle bir yere konulup mîrî tuz füruht olundukdan sonra füruht oluna mîrî tuz anbarından gayrı yerde tuz füruht olunmaya ve bi’l-cümle gemiciler bizim ma‘rifetimiz yoğ iken tuzları bir yere çıkarmayıp şöyle ki hufyeten çıkarıp âhar yerlerde der-mahzen eyleyeler ol makūle gemicilerin ve tuz getirenlerin muhkem haklarından gelip tuzları mîrî için girift oluna deyu iskelelerde nidâ ettirmek bâbında emr-i şerîfim ricâsına i‘lâm eylemeğin şartları ri‘âyet olunmak emr edip buyurdum ki Hüküm vardıkda bu bâbda sâdır olan fermân-ı şerîfim mûcebince amel edip dahi bir an ve bir sa‘at te’hîr ve terâhî etmeyip husûs-ı mezbûra her biriniz kemâl-i mukayyed ile mukayyed olup göresiz kazıyye vech-i meşrûh üzre tâbi‘-i taht-ı kazânızda olan iskelelerde muhkem nidâ ve tenbîh eyleyesiz ki min-ba‘d gemiciler mezkûrdan mültezimlerin kendilerin ma‘rifeti yoğ iken şart-ı iltizâmlarına çıkarıp satmayalar ve der-mahzen etmeyeler ve mîrî anbarda tuz var iken âhardan bir ferde tuz çıkarttırmayasız ve mîrî anbarda tuz var iken kimesneler getirdikleri tuz şimdiye değin emîni ma‘rifetiyle ne vechile der-mahzen olagelmiş ise yine ol vechile mezkûrdan mültezimler ma‘rifetleriyle der-mahzen ettirip mîrî tuz füruht olunmayınca mu‘tâd-ı kadîme ve eminlerin şart-ı iltizâmlarına muhâlif bir ferde tuz füruht ettirmeyesiz şöyle ki ba‘de’t-tenbîh eslemeyüp yine fermân-ı şerîfime muhâlif vaz‘ eyleyenlerin ellerinde bulunan tuzu alıp mîrî için girift ettirdikden sonra kendilere isimleri ve resimleri ile yazıp arz edesiz şer‘le haklarından geline şöyle bilesiz alâmet-i şerîfe i‘timâd kılasız. Tahrîren fi’l-yevmi’t-tâsi‘ şehri Cemâziyelevvel sene elf. Be-makām-ı Kostantıniyye