.:: İstanbul Kadı Sicilleri ::.


Üsküdar Mahkemesi 84 Numaralı Sicil (H.999-1000/ M.1590-1591)
cilt: 10, sayfa: 520
Hüküm no: 1019
Orijinal metin no: [96a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Firar eden Gebze, Kadıköy ve Kuzguncuk metropolidi Tenolidos’un yerine Timotyos’un tayin edildiği

Nişân-ı şerîf-i hümâyûn budur [ki] İşbu dârende-i fermân-ı hümâyûn Gekvize ve Kadıköy ve Kuzguncuk ve tevâbi‘i keferesi metropolidi olan Timotyos İstanbul kerefesi patriği olan Yermiye nâm râhibin mektûbu mûcebince firâr eden Tenolidos yerine metropolid olup ve âdet-i pişkeş için sene elf Cemâziyelevveli’nin on altıncı gününde altı bin akçesin gulâm-ı bâkī elinden dâhil-i hazîne olmağın mezkûra bu berât-ı sa‘âdet-âyâtı verdim ve buyurdum ki râhib-i mezbûr varıp firâr eden Tenolidos yerine olıgelen âdet ve kānûn üzre ve âyinleri mûcebince metropolid olup ol yerde olan papazlar ve keşişler ve sâir keferenin ulûsu ve gencîsi râhib-i mezbûru kendilerine metropolid bilip metropolidliğine müte‘allik olan umûrda buna mürâca‘atları olup sözünden tecâvüz eylemeyeler ve râhib-i merkūmun metropolidliğine müte‘allik olan kiliselere ve bağ ve mahalle ve çiftliklere ve manastırlara ve panayırlara ve değirmenlere ve ayazmalara ve bi’l-cümle kiliseye vakf olanlara bundan evvel metropolid olanlar ne vechile mutasarrıf olagelmişler ise râhib-i mezbûr dahi ol vechile mutasarrıf ola ve bir papaz veya bir keşiş mürd olsa âyinleri mûcebince her ne vasiyyet ederlerse makbûl ola ve bir kāfiri cebren kimesne Müslüman eylemeye ve bir papaz veyâhud bir keşiş veya bir kalogarya mürd olsa beş bin veya beş binden ziyâdesin mevkūfatçılar mîrî için zabt edip beş binden ekal olan râhib-i mezbûr patrik için zabt eyleye ve kurâ papazları râhib-i mezbûrun ma‘rifeti yoğiken kefereye nikâh eylemeye ve azl ve nasba müstahık olan papazları ve keşişleri azl ve nasb eylediğine âhardan kimesne dahl eylemeye ve bir avret erinden kaça veya bir zimmî avret boşamalı olsa veyâhud avret almalı olsa aralarına metropolidden gayrı kimesne girmeye ve keferenin nikâh husûsunda nâ’ibler ve gayrılar dahl eylemeye ve bi’l-cümle kendilerin âyinleri mûcebince manastırlara ve kiliselere ve ayazmalara vakf olanlar bundan evvel metropolid olanlar ne vechile zabt ve tasarruf edegelmişlerse râhib-i mezbûr dahi ol vechile zabt ve tasarruf eyleye şöyle bileler alâmet-i şerîfe i‘timâd kılalar. Tahrîren fi’l-yevmi’s-sâmin aşer şehri Cemâziyelevvel sene elf. Be-makām-ı Kostantıniyye m.