Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 519 Hüküm no: 1018 Orijinal metin no: [96a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mevlânâ Şeyh Mehmed b. Şeyh İbrahim’in bağ ve tarlasına taş çıkarmak için kuyu açıp zarar verenlerin teftiş edilip engellenmeleri Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ el-hâkim bi mahrûseti Üsküdar -zîdet fezâiluhû- tevkî‘-i refî‘-i hümâyûn vâsıl olıcak ma‘lûm ola ki dârende-i fermân-ı hümâyûn kıdvetü’s-sulehâi’s-sâlikīn Mevlânâ Şeyh Mehmed b. Şeyh İbrahim -zîde takvâhu- Bâb-ı sa‘âdet-me’âbıma gelip arzıhâl edip Ahmed nâm kimesne ile mahrûse-i mezbûreye tâbi‘ karye-i İstavros’dan Dimo ve Kosta ve Kemer ve Mihal nâm zimmîler ve bunlardan gayrı Taşçıbaşı ve Gürcü Sefer ve Toman ve Pedros ve Lağımcı Yakob ve Gürcü Orvan ve Gürcü Murad Ferhad ve Sinan-ı Kayseri ve Dolyan-ı Kayseri ve Emirşah ve Kapad ve Gürcü Pîrî ve Küçük Sefer ve Babacan ve Karabaş ve Bâzârcı Hüsrev ve İstemad ve Kulu ve Merkis ve Babik ve Nimesil nâm zimmîler zikr olunan karye-i İstavros kurbunda vâki‘ olan bağımın ve tarlamın içinde benim ma‘rifetim yoğiken yüz kırk yerde çukurlar kazıp ve taş çıkarıp alıp ve ba‘zı kiraz fidanlarımı dahi çıkarıp bağ ve tarla ve küllî zarar ve ziyân edip ta‘âddî eyledikleri ecilden üzerine nâ’ibü’ş-şer‘ varıp Müslümanlar mahzarlarında görüp keşf olundukda vech-i meşrûh üzre bulunduğu sicil olunmuşdur şer‘le görülüp icrâ-yı şer‘-i şerîf olunmak taleb eylerim elimde sûret-i sicil vardır deyu bildirdi imdi buyurdum ki hükm-i şerîfimle vardıkda ihzâr-ı husemâ kılıp ve bu bâbda gaybet edeni şer‘le buldurmasını lâzım olanlara her kande ise buldurup getirtip bir def‘a şer‘le görülüp fasl olunmayıp ve ûlâsından on beş yıl murûr etmiş değil ise an mûceb-i şer‘-i şerîf hak üzre teftîş ve tefahhus edip ve bu bâbda yedinde olan sûret-i sicile nazar kılıp göresin kazıyye arz olunan gibi ise ki şer‘le sâbit ve zâhir ola ol bâbda emr-i şer‘-i kavîm ile âmil olup ve sûret-i sicilin mazmûnu muvâfık-ı şer‘-i kavîm olup alâ vechi’l-hasm sâbit oldukdan sonra mûcebiyle amel edip bu bâbda mevlânâ-yı mezbûrun şer‘le lâzım ve müteveccih olan hakkını her ne ise hükm edip alıveresin şer‘-i şerîf ve mazmûn-ı münîf sûret-i sicill-i şer‘iyyeye muhâlif kimesneye iş ettirmeyesiz eslemeyüp temerrüd ve inâd edeni ve muhtâc-ı arz olanı yazıp arz edesin tamâm dikkat ve ihtimâm edip tekrâr kapıma şikāyet olunmak eylemeyesin tezvîrden ve telbîsden ve şuhûd-ı zûrdan hazer edip vakfiyyede medhali olmayanı dahl ettirmeyesiz şöyle bilesiz ve ba‘de’n-nazar bu hükm-i hümâyûnumu yedinde ibkā edip alâmet-i şerîfe i‘timâd kılasız. Tahrîren fî evâili Şa‘bân sene selâse ve tis‘în ve tis‘a-mi’e. Be-makām-ı Kostantıniyye