Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 525 Hüküm no: 1026 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hassa raht hazinesine sahtiyan veren Mehmed b. Hamza’nın tekâlîf-i örfiyyeden muâf olduğu Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ el-hâkim bi mahrûseti Üsküdar -dâmet fezâiluhû- tevkî‘-i refî‘-i hümâyûn vâsıl olıcak ma‘lûm ola ki hâliyâ iftihârü’l-emâcid ve’l-ekârim câmi‘ü’l-mehâmid ve’l-mekârim el-muhtas bi mezîdi inâyeti’l-meliki’l-mu‘în büyük mirâhorum -dâme mecduhû- Dergâh-ı mu‘allâm’a tezkire gönderip Istabl-ı âmire müteferrikalarından yevmî on akçe ulûfeye mutasarrıf olan Mehmed b. Hamza dokuz yüz doksan târihinden beri hâssa raht hazînesine sahtiyan verip bu âna değin kimesne rencîde eylemezken hâlâ ehl-i örf tâifesi hilâf-ı kānûn tekâlîf-i örfiyyeden ba‘zı nesne teklîf eyleyip rencîde ettiklerin i‘lâm eylemeğin buyurdum ki hükm-i şerîfim vardıkda husûs-ı mezbûra mukayyed olup göresin fi’l-vâki‘ mezbûr Mehmed ıstabl-ı âmire müteferrikalarından olup hâssa raht hazînesinden sahtiyan verip bu âna değin kimesne rencîde eylemez iken hâlâ ehl-i örf tâifesi hilâf-ı defter ve kānûn rencîde eyledikleri vâki‘ ise men‘ ve def‘ edip cebren mezbûru kimesneye rencîde ve remîde ettirmeyesiz söyle bilesiz ve ba‘de’n-nazar bu hükm-i şerîfimi sicill-i mahfûza kayd eyledikden sonra mezbûrun elinde ibkā edip alâmet-i şerîfe i‘timâd kılasız. Tahrîren fi’l-yevmi’l-hâmis aşer şehri Cemâziyelâhir li sene elf. Be-makām-ı Kostantıniyye