Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 526 Hüküm no: 1028 Orijinal metin no: [97b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Mustafa’nın evine zorla girip mal almak isteyenlerin engellenmesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ Üsküdar kadısı -zîdet fezâiluhû- tevkî‘-i refî‘-i hümâyûn vâsıl olıcak ma‘lûm ola ki mahrûse-i mezbûra tâbi‘ dârendegân-ı fermân-ı şerîf nefs-i Karamürsel halkı Dergâh-ı mu‘allâm’a âdem gönderip arzıhâl edip nefs-i Karamürsel’de Hoş Kadem mahallesinde Kara Mustafa nâm kimesne hâtunu hamamda iken kendiye mülk evin içinde celb eyledikde üzerine hâkim gelip sicil ve hüccet olunup bu bâbda şer‘an bir nesne lâzım gelmez iken ehl-i örf tâifesi mücerred celb-i mâl için hilâf-ı şer‘-i şerîf rencîde edip zulm ve te‘addî etmek ister hayfdır şer‘le görülüp icrâ-yı hak olunmasın taleb ederiz deyu bildirdiler imdi buyurdum ki hükm-i şerîf-i vâcibü’l-ittibâ‘ım ile vardıkda bu bâbda ol vechile dahl olundukda husemâyı berâber edip bu husûs bir def‘a şer‘le görülüp fasl olunmayıp ve bilâ özr-i şer‘î on beş yıl mürûr etmiş değil ise ber mûceb-i şer‘-i şerîf hak üzre teftîş ve tefahhus edip göresiz kazıyye arz olunan gibi ise ol bâbda emr-i şer‘-i kavîmle amel edip şer‘le lâzım geleni icrâ edesiz min-ba‘d bunları şer‘-i şerîfe muhâlif ehl-i örf tâ‘ifesine ve Muslu Bey veresesine ve âhara rencîde ettirmeyip hilâf-ı şer‘ bir akçe ve bir habbelerin aldırmayıp men‘ ve def‘ edesiz hak üzre olup tezvîr ve telbîsden ve şuhûd-ı zûrdan be-gāyet hazer edip ve kazıyyede medhali olmayanı aslâ dahl ettirmeyip temerrüdü seğedüp eslemeyeni ve muhtâc-ı arz olanı yazıp bildiresiz tekrâr kapıma şikāyet olunup ve bir emr-i şerîfim dahi varmalı eylemeyesiz şöyle bilesiz ve ba‘de’n-nazar bu hükm-i hümâyûnumu ellerinde ibkā edip alâmet-i şerîfe i‘timâd kılasız. Tahrîren fî evâili şehri Recebi’l-mürecceb sene elf mine’l-hicreti’n-nebeviyye. Be-makām-ı Kostantıniyye.