Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 527 Hüküm no: 1030 Orijinal metin no: [98a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed Paşa Vakfı mütevellîsi Cemşid’in yerine erşed-i evlâddan Mehmed’in mütevellî tayin olduğu Nişân-ı şerîf-i âlîşân budur ki Akzâ kuzâti’l-müslimîn mahmiye-i İstanbul kadısı Mevlânâ Muslihiddin -zîdet fezâiluhû- Der-i sa‘âdetime arz gönderip vilâyet-i Anadolu ve Rumeli’nde evkāf müteferrikası olan merhûm Hacı Ahmed Paşa’nın cümle evkāfının yevmî on akçe ile tevliyeti erşed-i evlâdına meşrûta olmağın hâlâ hilâf-ı şart-ı vâkıf yevmî otuz akçe ile Cemşid nâm kimesneye verilmeğin ref‘ olunup yerine erşed-i evlâddan mezkûr Mehmed’e mahaldir deyu i‘lâm eylemeğin ber mûceb-i şart-ı vâkıf yevmî on akçe ile vermek fermân-ı şerîfim olmağın erşed-i evlâddan işbu dârende-i fermân-ı vâcibü’l-iz‘ân kıdvetü’l-emâsil ve’l-akrân mezkûr Mahmud’a zide kadruhû mevlânâ-yı mûmâileyhin arzı mûcebince evkāf-ı mezbûreye mütevellî olup ref‘ olunan Cemşid b. Abdullah yerine sene elf Recebi’nin beşinci gününden yevmî on akçe ile mütevellî nasb edip bu berât-ı âlîşân-ı verdim ve buyurdum ki varıp evkāf-ı mezbûreye mütevellî olup şöyle ki vezâyif-i hidemât tevliyettir mer‘î ve mü’eddâ kıldıkdan sonra ta‘yîn olunan yevmî on akçe vazîfesin evkāf-ı mezbûre mahsûlünden alıp mutasarrıf ola ol bâbda hiç ahad mâni‘ ve dâfi‘ olmaya şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis şehri Recebi’l-mürecceb sene elf. Be-makām-ı Kostantıniyye m.