Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 531 Hüküm no: 1037 Orijinal metin no: [99a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan’ın oğlunun sipâhizade olması hasebiyle Eğrioğlu ve Çıldır köyünün timar olarak verilmesi Nişân-ı şerîf-i âlîşân-ı sâmî mekân-ı sultânî ve tuğrâ-yı garrâ-yı cihân sitân-ı hâkānî hükmü oldur ki Râfi‘-i tevkî‘-i refî‘-i hâkānî Südde-i sa‘âdetime gelip Kocaeli sancağında otuz yedi bin beş yüz akçe ze‘âmeti olan Hasan’ın oğlu olup yarardır deyu Kocaeli sancağı beyi arz eyledikde ibtidâdan dört bin akçe tîmara emr-i şerîf verilmeğin livâ-i mezbûrda Kandırı nâhiyesinde Eğrioğlu nâm karye ve gayrinden işbu sekiz bin sekiz yüz akçe tîmar Yahya Oğlu müteveffâ Murad tahvîlinden mahlûldür deyu ricâ etmeğin bin dört yüz akçe ziyâdesiyle tavsiye edesin deyu bin Recebi’nin yirmi sekizinci gününde emr-i şerîf verildikden sonra bin dört yüz akçe ziyâdesiyle tezkiresin Südde-i sa‘âdetimden verilmek fermânım olup sipâhizâdedir deyu arz olundukda Südde-i sa‘âdetimden berât olunmak ve bin yedi yüz elli akçe ziyâdesi verilmek emrim olmağın zikr olunan sekiz bin sekiz yüz akçe tîmar ikrâr olmayan iki yüz doksan dokuz akçe ziyâdesiyle tavsiye olunup Südde-i sa‘âdetimden verdim ki zikr olunur karye-i Eğrioğlu tâbi‘-i Kandırı 2237 karye-i Çaldır tâbi‘-i Yavaşi 4037 Yekûn 9284 ve buyurdum ki ba‘de’l-yevm taht-ı yedinde olup tasarruf kılıp şöyle ki vezâyif-i hidemât-ı mebrûre ve mesâ‘î-i meşkûre-i asâkir-i mansûredir ber mûceb-i defter-i hâkānî mü’eddâ kılalar ol bâbda hiç ferd mâni‘ olmaya şöyle bileler alâmet-i şerîf-i âlem-ârâya i‘timâd kılalar. Tahrîren fî Ramazâni’l-mübârek sene 1000. Be-makām-ı Kostantıniyye el-mahrûse