Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 531 Hüküm no: 1036 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölelerin satış ücretlerinin devlete ait olduğu Mefâhirü’l-kuzât ve’l-hükkâm me‘âdinü’l-fezâyil ve’l-kelâm müzâhiru’ş-şerâyi‘ ve’l-ahkâm Kocaeli mukāta‘ât müfettişi vilâyet-i mezbûre kadıları -zîde fazluhüm- tevkî‘-i refî‘-i hümâyûn vâsıl olıcak ma‘lûm ola ki Yusuf nâm kimesne Dergâh-ı sa‘âdetime gelip arzıhâl sunup Kocaeli sancağında vâki‘ mensûh piyâde yerlerin ve sâirde ahz olan abd-i âbıkın füruht-ı mîrînin müjdesin sâhib-i arza hâsıl kayd olmağla ba‘zı zu‘emâ ve erbâb-ı tîmar ve çavuşlar ve sancakbeyleri ve subaşıları füruht dahi bizimdir deyu vilâyet defterine muhâlif dahl ve ta‘arruz etmekle mîrîye küllî gadr etmekden hâlî değillerdir men‘ ve def‘ olunmak bâbında emr-i şerîf ricâ ederim deyu bildirdi buyurdum ki hükm-i şerîfimle vardıkda husûs-ı mezbûra mukayyed ve bî-garaz ahâlî-i vukūfdan hak ve adl üzre teftîş ve tefahhus edip göresiz fi’l-vâki‘ kazıyye i‘lâm olunduğu gibi olup livâ-i mezbûrede vâki‘ mensûh yerlerinde ve gayrıda ahz olan abd-i âbıkın füruht mîrînin iken ol makūle erbâb-ı tîmar ve zu‘emâ ve çavuşlar ve sancakbeyi ve kethüdâları ve subaşıları füruht etmek istedikleri mukarrer ise men‘ ve def‘ edip min-ba‘d kānûn-ı kadîmeye muhâlif ettirmeyip ahz olan abd-i âbıkın müjdesin cânib-i mîrîden sâhib-i arza verip müddet-i örfiyyesin tamâm oldukdan sonra şart-ı iltizâmı üzre cânib-i mîrîden füruht ettirip hâsıl olan akçesin bi’t-tamâm ve’l-kemâl mîrî için emîn-i mezbûra zabt ve kabz ettirip sâir emvâl-i hâssa ile Der-i sa‘âdetime irsâl ve Hızâne-i âmire idhâl ettirip emr-i şerîfime muhâlif bî-vech dahl etmek isteyen subaşıları ve sâirlere mufassal ve meşrûh yazıp bildiresin husûs-ı mezbûrda mukayyed olup emr-i âhar irsâline muhtâc eylemeyesin şöyle bilesin alâmet-i şerîfeye i‘timâd kılasın. Tahrîren fi’l-yevmi’l-âşir şehri Ramazâni’l-mübârek sene elf. Be-makām-ı Kostantıniyye