Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 533 Hüküm no: 1040 Orijinal metin no: [99b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miriye pelit kerestesi getiren, Şile halkından çam kerestesi istenilmemesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ Üsküdar kadısı -zîdet fezâiluhû- tevkî‘-i refî‘-i hümâyûn vâsıl olıcak ma‘lûm ola ki taht-ı kazânıza tâbi‘ Şile nâm kasaba halkı Dergâh-ı mu‘allâm’a adam gönderip kasaba-i mezbûre halkı kadîmden mîrîye pelit kerestesi getire gelip olıgelen üzre uhdelerine lâzım olan hizmetlerin bî-kusûr edâ ederler iken hâlâ mücerred ahz u celb için çam kerestesin dahi getirmeyi teklîf olunup lâkin mezbûr kasaba halkına karîb mahalde çam kerestesi olmayıp âhar kazâda iki üç günlük yolda olmağın getirmeye iktidârı olmadığın bildirdi ol bâbda hükm-i hümâyûnum ricâ eyledikleri ecilden arz eyledikleri üzre kadîmden edegeldikleri hizmetlerin bî-kusûr edâ eyledikden sonra olıgelene muhâlif ol vechile teklîf eyleyenleri men‘ ve def‘ edip min-ba‘d iktidârları olmadığı hizmete mücerred ahz u celb sebebiyle teklîf ettirmeyesin deyu ellerine mukaddemâ hükm-i hümâyûn verilip mûcebince amel olunmak bâbında hükm-i şerîf ricâ eyledikleri ecilden buyurdum ki sâbıkan mûcebince amel olup olıgelene muhâlif teklîf ve rencîde ettirmeyesiz şöyle bilesiz alâmet-i şerîfe i‘timâd kılasız. Tahrîren fî evâhiri şehri Zilhicceti’l-harâm. Be-makām-ı Kostantıniyye el-mahrûse