Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 534 Hüküm no: 1042 Orijinal metin no: [100a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kocaeli sancağındaki hane-i avârız ve muâfların ayrı defterlere kayd olunup kadılara teslim edildiği Mefâhirü’l-kuzât ve’l-hükkâm me‘âdinü’l-fazl ve’l-kelâm livâ-i Kocaeli’nde vâki‘ olan kadılar -zîde fazluhüm- tevkî‘-i refî‘-i hümâyûn vâsıl olıcak ma‘lûm ola ki siz ki livâ-i mezbûre kadılarısız livâ-i mezbûrun Hızâne-i âmire’de hâne-i avârız defteri olmamağla bundan akdem livâ-i mezbûre muharriri olan kıdvetü’l-emâcid ve’l-ekârim Derviş -zîde mecduhû-ya livâ-i mezbûrun hâne-i avârızın müstakil defter edip avârız alınmak îcab edenleri başka ve mu‘âf olanları başka yazıp birer sûretin imzâlayıp ve mühürleyip kadılara teslîm edip ve birer sûretin imzâlayıp der-i sa‘âdetime getirip Hızâne-i âmire’ye teslîm edip min-ba‘d mûcebiyle amel oluna deyu hükm-i şerîfim verilmiş idi. Eyle olsa muharriri müşârunileyh yazdığı avârız defteri mûcebince eğer doğancı ve eğer köprücü ve eğer sipâhi-zâde ve eğer zâviyedâr ve sâir evkāf re’âyâsıdır ve gayridir ve bi’l-cümle hâne-i avârızdan ifrâz olunup mu‘âfiyetleri deftere kayd olanların ellerine verildiği sûret-i defter mûcebince amel edip ve min-ba‘d müşârunileyhin Hızâne-i âmire’ye teslîm edip her birinize irsâl ettiği hâne-i avârız defteri ile amel olunmak emr edip buyurdum ki hükm-i şerîfim vardıkda bu bâbda olan fermân-ı sa‘âdetim mûcebince amel edip siz ki livâ-i mezbûr kadılarısız işbu hükm-i şerîfimi sicill-i mahfûzunuza kayd eyleyip ve nevâhî nâ’iblerine dahi muhkem tenbîh ve te’kîd edesiz ki min-ba‘d vech-i meşrûh üzre amel eyleyip hilâfına cevâz göstermeyip tahrîr ref‘ olundu deyu avârız husûsunda bir türlü dahl olmakdan be-gāyet hazer edesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’l-hâmis aşer şehri Zilka‘de sene elf. Be-makām-ı Kostantıniyye