Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 535 Hüküm no: 1043 Orijinal metin no: [100a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Her şarap fıçısı için altmışar akçe harâc veren Kadıköy ve İstavros köylülerinden, fazla para istenmesinin engellenmesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ el-hâkim bi mahmiyeti Üsküdar -zîdet fezâiluhû- tevkî‘-i refî‘-i hümâyûn vâsıl olıcak ma‘lûm ola ki kazâ-i mezbûra tâbi‘ Kadıköy ve İstavros nâm karyeler ahâlîsi der-i sa‘âdetime arzıhâl gönderip zikr olunan karyelerin birisi mîrî çayıra hizmet eyleyip ve biri dahi tersâne-i âmire için funda hizmeti edip ve bundan mâ‘adâ ref‘ olunan âdet-i hamr için harâcımız on beşer akçe ziyâde olduğundan mâ‘adâ hâlâ hamr emînleri bizden ziyâde akçe alıp zulm ve te‘addî ederler bu husûs bundan evvel hamr emînleri ile kavl u karâr olunup her fıçı başına altmışar akçe verile deyu fermân olunmuşken şimdiki hâlde altmışar akçeye râzı olmayıp vech-i meşrûh üzre ziyâde akçe alırlar şart ve iltizâmlarında ziyâde akçe alınmamak yanında emr-i şerîf ricâsına i‘lâm eylemeğin geçen sene hamr eminleri ile sulh eyledikleri üzre bunların altmışar akçeleri alınıp bî-vech ziyâde alınmaya vech-i meşrûh üzre kavilleri mukarrer ise bakır fıçılarından altmışar akçe aldırıp bundan ziyâde bir akçe ve bir habbelerin aldırmayasız deyu dokuz yüz doksan dokuz Muharremi’nin beşinci günü târihli müverrah hükm-i şerîf verilmişken hâlâ yine hilâf-ı emr-i şerîf dahl olunduğun bildirip mahallinde tekrâr emr-i şerîfim ricâsına i‘lâm eylemeğin buyurdum ki hükm-i şerîfim ile Dergâh-ı mu‘allâm çavuşlarından Osman Çavuş -zide kadruhû- vardıkda hamr eminleri ile bunları berâber eyleyip gönderesiz mukaddemâ vech-i meşrûh üzre emr-i şerîfim verilmiş iken hâlâ bî-vech ve bilâ-sebeb ziyâde akçe taleb olunup bunları rencîde ve remîde eylemek isterlerse men‘ ve def‘ edip mukaddemâ vech-i merkūm üzre olan kavilleri mûcebince amel edip bunların bî-vech ve bilâ-sebeb ziyâde akçelerin aldırmayasız şöyle bilesiz alâmet-i şerîfe i‘timâd kılasız Tahrîren fi’l-yevmi’s-sânî aşer min şehri Muharremi’l-harâm sene ihdâ ve elf.