Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 282 Hüküm no: 274 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Molla Ahmed b. Mehmed’den boşanan Ayşe bt. Hüseyin’in yanındaki çocuğu Fâtıma için nafaka tayin olunduğu Mahrûse-i İstanbul’da Molla Zeyrek Mahallesi sâkinelerinden işbu râfi‘atü’l-vesîka Âişe bt. Hüseyin nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i sâbıkı Molla Ahmed b. Mehmed nâm kimesne mahzarında takrîr-i kelâm ve tâ‘bir ani’l-merâm edip mezbûr Molla Ahmed’in firâşından hâsıla ve benden mütevellide hâlâ bi-hakkı’l-hıdâne hacr ve terbiyemde olan işbu sadriye sagīre kızım Fâtıma’nın mâlı olmamağla nafaka ve kisveye eşedd-i ihtiyâc ile muhtâce olmağla sagīre-i mezbûre Fâtıma’nın nafaka ve kisve ve sâir levâzım-ı zarûriyyesi’çün babası Molla Ahmed üzerine kıbel-i şer‘den kadr-i kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyyesi’çün babası mezbûr Molla Ahmed üzerine târih-i kitâbdan bi’t-terâzî külli yevm iki para farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisve ve sâir levâzım-ı zarûriyyesine harc ve sarfa vakt-i zarûretde istidâneye ve lede’z-zafer babası mezbûr Molla Ahmed üzerine rücû‘a mezbûre Âişe Hatun’a izin-birle mâ-hüve’l-vâki‘ bi’t-taleb ketb olundu. Hurrire fî-2 min-Receb [1]143. Şuhûdü’l-hâl: Kasım [b.] el-Hâc Hüseyin, Dâmâd İbrahim Çelebi b. Ahmed, Mehmed b. Hüseyin, Hasan b. Mehmed ve gayruhum.