Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 281 Hüküm no: 273 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed ile boşandığı kocası İbrahim Efendi b. Halil’in aralarında olan alacak davasında sulh oldukları Mahmiye-i İstanbul’da Koska kurbünde Kızıltaş Mahallesi’nde sâkine olup zâtı Yahya Efendi b. Abdülhalim ve Hasan Çavuş b. İbrahim ta‘rîfleriyle mu‘arrefe olan Âişe bt. Ahmed nâm hatun meclis-i şer‘-i hatîr-i lâzımü’t-tevkīrde zevc-i sâbıkı işbu bâ‘isetü’l-vesîka İbrahim Efendi b. Halil mahzarında ikrâr ve takrîr-i kelâm edip mezbûr İbrahim Efendi zevcim olup târih-i vesîkadan dokuz ay mukaddem beni bâyinen tatlîk etmekle zimmetinde mütekarrir ve ma‘kūdun-aleyh yirmi beş guruş mehr-i müeccelim ile mezbûrun firâşından hâsıla ve benden mütevellide bi-hakkı’l-hıdâne hacr ve terbiyemde olan sadriye kızım Rukiye nâm sagīre bâ-hüccet mefrûza-i müstedânesinden yedi guruş ve sagīre-i mezbûre vefât ettikde techîz ve tekfîni için mâlımdan harc ve sarf eylediğim yedi guruş ki cem‘an otuz dokuz guruş hakkımı mezbûrdan taleb ve da‘vâ eylediğimde beynimizde mezbûr İbrahim Efendi ile nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden on guruş üzere beni sulh eylediklerinde ben dahi sulh-ı mezbûru ba‘de’l-kabûl ve bedel-i sulh olan meblağ-ı mezkûr on guruşu zevcim mezbûr İbrahim Efendi yedinden tamamen ahz u kabz eylediğimden sonra husûs-ı mezkûra ve sâire müte‘allika âmme-i da‘vâdan her biri âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî-29 Cemâziyelâhir sene [1]143. Şuhûdü’l-hâl: Salih Efendi b. Mehmed, es-Seyyid Mustafa b. Hasan, Osman b. Mustafa, İbrahim b. Mustafa ve gayruhum.