Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 283 Hüküm no: 276 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen Mehmed b. Mustafa’nın halası Havva bt. Mustafa’nın Ali Beşe b. Osman üzerine açtığı davada sulh oldukları Dem [ü] diyet da‘vâsından sulh. Mahmiye-i İstanbul’da Altımermer kurbünde Seydî Ömer Mahallesi sâkinelerinden zikri âtî katîlin ber-mûceb-i hüccet-i şer‘iyye halası ve hasren vârisi olup zâtı Hasan Çelebi b. Ahmed ve Abdullah Beşe b. Hüseyin nâm kimesneler ta‘rîfleriyle mu‘arrefe olan Havvâ bt. Mustafa nâm hatun meclis-i şer‘-i hatîr-i lâzımü’t-tevkīrde işbu hâfızü’l-kitâb Ali Beşe b. Osman nâm kimesne mahzarında ikrâr-ı tâm ve takrîr-i kelâm edip mûrisim müteveffâ Mehmed b. Mustafa b. Abdullah’ın bundan akdem medîne-i Galata’da Kurşunlu mahzen önünde ba‘de’l-asr bıçak ile darb ve cerh ve katletmekle mezbûr Ali Beşe’den mûceb-i şer‘îsini taleb ve da‘vâ eylediğimde ol dahi bi’l-külliye inkâr edicek ben dahi müdde‘âmı ber-vech-i muharrer isbât sadedinde iken beynimize muslihûn tavassut edip da‘vâ-yı mezkûremden beni mezbûr Ali Beşe ile an-inkâr yüz guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûru mezbûr Ali Beşe yedinden tamamen ahz u kabz eylediğimden sonra husûs-ı mezbûra müte‘allika âmme-i da‘vâ ve kâffe-i mütâlebâtdan mezbûr Ali Beşe’nin zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi bedel-i sulh deyü bana medfû‘u olan meblağ-ı mezbûr yüz guruşa müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî-gurreti Recebi’l-ferd sene [1]143. Şuhûdü’l-hâl: Ahmed Beşe b. Mustafa, İbrahim Beşe b. Hüseyin, Ali Beşe b. Mehmed, İbrahim Beşe b. Mehmed, Ali Beşe b. Hüseyin, Mehmed Çelebi b. Abdullah.