Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 284 Hüküm no: 277 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Ahmed’in alacak davasında Ağya v. Kirkor’un zimmetini ibra ettiği Yemîn ve ibrâ. Mahmiye-i İstanbul’da Davudpaşa Mahallesi’nde sâkin Hasan Çelebi b. Ahmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’r-rakīm Kirkor v. Ağya [Ağya v. Kirkor] nâm zimmî muvâcehesinde üzerine da‘vâ ve takrîr-i kelâm edip târih-i vesîkadan altı sene mukaddem mezbûr Ağya’ya mâlımdan yirmi guruş ve bir def‘a dahi otuz altı guruş ki cem‘an elli altı guruş ikrâz ve teslîm eylediğimde ol dahi ber-vech-i muharrer iktirâz ve tesellüm ve mesârifine sarfla istihlâk eylediği ecilden meblağ-ı mezbûr zimmetinde hakkım olmağla meblağ-ı mecmû‘-ı mezkûru bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan ber-vech-i muharrer müdde‘âsına mutâbık beyyine taleb olundukda ityân-ı beyyineden ba‘de izhâ[ri]’l-acz meblağ-ı mezkûr yirmi guruş için istihlâf etmeğin mezbûr Ağya dahi alâ-vefkı’l-mesûl yemîn ettikden sonra müdde‘î-i mezbûr Hasan ber-vech-i muharrer müdde‘âsı olan meblağ-ı mezbûrdan otuz altı guruşa ve sâire müte‘allika âmme-i da‘vâdan mezbûr Ağya’nın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Recebi’l-ferd sene [1]143. Şuhûdü’l-hâl: İbrahim Çelebi b. Halil, Mehmed Çelebi b. Ahmed, Mustafa Çelebi b. Mehmed, Mehmed Çelebi b. Abdullah, diğer Mehmed Çelebi b. Abdurrahman, Süleyman Çelebi b. Abdürrahim.