Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 312 Hüküm no: 306 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden İbrahim Paşa’nın mirahoru Yusuf Ağa b. Abdullah b. Abdurrahman’ın cariyesi Gürcü asıllı Fethi bt. Abdullah’ın hür olduğu Sâbıkā rıkkını mu‘terife olmağla ber-vech-i âtî da‘vâya kıbel-i şer‘den me’zûn olan orta boylu, çatık kaşlı, elâ gözlü Gürciyyetü’l-asl Müslimetü’l-mille bâ‘isetü hâzihi’l-vesîka Fethi bt. Abdullah meclis-i şer‘-i şerîfde vezîriazam-ı sâbık merhûm İbrahim Paşa’nın hayâtında mirâhoru iken bundan akdem vefât eden Yusuf Ağa b. Abdullah b. Abdurrahman’ın zâhirde vâris ve vârisesi olmamağla terekesi cânib-i beytülmâle âid olmağın tereke-i mezkûresine bi’l-emâne vâzı‘u’l-yed olan hâlâ şıkk-ı evvel defterdârı câmi‘ü’l-emvâli’s-sultânîyye hâfızü’l-hazâini’l-Osmaniyye sa‘âdetlü semâhatlü Ali Beyefendi b. el-merhûm Mehmed Paşa etbâ‘ından husûs-ı âtîde husûmet ve red ve cevâba vekîl-i şer‘îleri Ebûbekir Ağa b. Şa‘ban mahzarında üzerine da‘vâ ve takrîr-i kelâm edip müteveffâ-i mezbûr Yusuf Ağa hayâtında yedinde câriye-i memlûkesi olduğum hâlde beni tedbîr-i mutlak ile müdebbere edip terekesinden sülüsü kınnen kıymeti[mi]n esmânına [sülüsânına] müsâ‘id olmağın sâir harâir-i asliyyât gibi hürre olmuş iken müvekkil-i müşârun-ileyh tereke-i mezkûreden rık olmak üzere bi-gayr-ı hakkın bana vaz‘-ı yed etmeğin hâlâ vekîl-i mezbûra suâl olunup müvekkil-i müşârun-ileyh benden kasr-ı yed ve sebîlim tahliyye olunmak üzere tenbîh olunması matlûbumdur dedikde gıbbe’s-suâl vekîl-i mezbûr cevâbında müteveffâ-i mezbûr Yusuf Ağa’nın terekesinden olmak üzere mevsûfe-i mezbûreye ber-vech-i muharrer vaz‘-ı yedini bi’l-vekâle ikrâr mâ‘adâyı inkâr edicek mevsûfe-i mezbûreden müdde‘âsını mübeyyine beyyine taleb olundukda udûl-i Müslimînden müteveffâ-i mezbûrun hayâtında imâmı Mehmed Efendi b. Ahmed ve Mehmed Ağa b. Ali ve ahır kethüdâsı Mehmed Ağa b. Mustafa ve Berber Yusuf Çelebi b. Abdullah ve Saka Mehmed Beşe b. Hüseyin nâm kimesneler li-ecli’ş-şehâde [68a] meclis-i şer‘a hâzirûn olup isre’l-istişhâd fi’l-hakīka müteveffâ-i mezbûr Mirâhor Yusuf Ağa b. Abdullah b. Abdurrahman hayâtında mevsûfe-i mezbûreyi yedinde câriye-i memlûkesi olduğu hâlde bizim huzûrumuzda tedbîr-i mutlak ile müdebbere eyledi ve terekesinin sülüsü mevsûfe-i mezbûrenin kınnen kıymetinin sülüsüne [sülüsânına] müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mevsûfe-i mezbûrenin sebîli tahliyye olunup mâ-vaka‘a bi’t-taleb ketb [olundu]. Fi’l-yevmi’s-sânî min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Ağa b. Mehmed ve Mehmed Çelebi b. Abdullah ve Du‘âcı İbrahim b. Mustafa ve Abdullah b. Yusuf ve Yusuf b. Abdullah ve Ya‘kub b. Abdullah ve Câbî Mehmed b. Ahmed, Abdullah.