Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 311 Hüküm no: 305 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Ömer Efendi’nin terekesi davasında vârisleri ile Ali Ağa b. Abdullah’ın sulh oldukları Mahmiye-i İstanbul’da Beyceğiz Mahallesi ahâlîsinden olup diyâr-ı Acem’den medîne-i Revan’a tâbi‘ Elikli nâm karyede katîlen vefât eden el-Hâc Ömer Efendi b. İbrahim b. Osman’ın verâseti zevce-i metrûkesi Fâtıma bt. el-Hâc Mehmed nâm hatun ile sulbî kebîr oğlu İbrahim ve sulbiye kebîre kızı Havvâ Hatun’a ve evlâd-ı sıgārı Feyzullah ve Ümmügülsüm ve Emine’ye münhasıra olduğundan sonra zâtı ta‘rîf-i şer‘î ile mu‘arrefe olan mezbûre Fâtıma ile mezbûr İbrahim’den her biri asâleten ve sıgār-ı merkūmûnun vâlideleri ve tesviye-i emiriyyelerine kıbel-i şer‘den mansûbe vasîleri olan mezbûre Fâtıma Hatun vesâyeten ve mezbûre Havvâ’nın zevci ve tarafeynden husûs-ı âti’z-zikre vekîl olduğu zâtını ârifân Mehmed Efendi b. Abdullah ve mezbûr İbrahim şehâdetleriyle sâbit ve sübût-ı vekâlete hükm-i şer‘î lâhık olan Veliyüddin Çelebi b. Hasan meclis-i şer‘-i şerîfde sâbıkā medîne-i mezkûre mütesellimi olmağla müteveffâ-i mezbûrun terekesine bi’l-emâne vâzı‘u’l-yed olan bâ‘isü hâze’l-kitâb Ali Ağa b. Abdullah b. Abdurrahman tarafından husûs-ı âti’l-beyâna vekîl olduğu el-Hâc Mehmed b. Ahmed ve Receb Çelebi b. İbrahim şehâdetleriyle sâbit olan Ömer Efendi b. Osman mahzarında her biri bi’l-asâle ve bi’l-vesâye ve bi’l-vekâle takrîr-i kelâm ve bast-ı merâm edip müvekkil-i mezbûr Ali Ağa mûrisimiz müteveffâ-i mezbûrun terekesinden ber-mûceb-i defter altı yüz altmış guruş ber-vech-i muharrer ahz u kabz etmişidi deyü meblağ-ı mezbûru taleb ve da‘vâ ve ba‘de’l-münâza‘a beynimize muslihûn tavassut edip müvekkil-i mezbûru bizimle beş yüz altmış guruş üzerine sulh eylediklerinde biz dahi sulh sıgār-ı merkūmûn haklarında enfa‘ olduğuna binâen sulh-ı mezkûru kabûl ve bedel-i sulh-ı mezkûr beş yüz altmış guruşu müvekkil-i merkūm Ali Ağa yedinden ba‘de’l-hakīki? ahz u kabz eylediğimden sonra mûrisimiz müteveffâ-i mezbûrun terekesine müte‘allika âmme-i da‘vâdan müvekkil-i mezbûr Ali Ağa’yı asâleten ve vekâleten ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fî-16 min-Recebi’l-ferd sene [1]143. Şuhûdü’l-hâl: Kasım Ağa b. Osman, el-Hâc Abdurrahman Ağa b. Mustafa, Mehmed Efendi b. Abdullah, fahrü’l-kuzât es-Seyyid İbrahim Efendi b. es-Seyyid Bahaeddin, Abdullah Ağa b. Abdullah, Abdullah b. Osman, Osman b. Ahmed, el-Hâc Halil b. Abdullah, Derviş Ağa b. Abdullah.