Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 315 Hüküm no: 309 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden İbrahim Paşa’nın mirahoru Yusuf Ağa b. Abdullah b. Abdurrahman’ın kölesi Gürcü asıllı Hasan b. Abdullah’ın hür olduğu Rıkk-ı sâbıkını mu‘terif olmağla ber-vech-i âtî da‘vâya kıbel-i şer‘den me’zûn olan orta boylu, açık kaşlı, elâ gözlü Gürciyyü’l-asl Müslimü’l-mille bâ‘isü hâzihi’l-vesîka Hasan b. Abdullah nâm gulâm meclis-i şer‘-i şerîf-i enverde vezîriazam-ı sâbık merhûm İbrahim Paşa’nın hayâtında mirâhoru iken vefât eden Yusuf Ağa b. Abdullah b. Abdurrahman’ın zâhirde vâris ve vârisesi olmamağla terekesi cânib-i beytülmâle âid olmağın tereke-i mezkûresine bi’l-emâne vâzı‘u’l-yed olan câmi‘ü’l-emvâli’s-sultânîye hâfızü’l-hazâini’l-Osmaniyye umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam sa‘âdetlü semâhatlü Ali Beyefendi b. el-merhûm Mehmed Paşa hazretlerinin ağa-yı zevi’l-ihtirâmlarından ve taraf-ı şerîflerinden ber-vech-i âtî husûmet ve redd-i cevâba vekîl-i şer‘îleri olan Ebûbekir Ağa b. Şa‘ban mahzarında üzerine da‘vâ ve takrîr-i kelâm edip müteveffâ-i mezbûr Mirâhor Yusuf Ağa hayâtında yedinde mülk ve hakkı olduğum hâlde beni tedbîr-i mutlak ile müdebber edip terekesinin sülüsü kınnen kıymetimin sülüsânına müsâ‘id olmağla ben sâir ahrâr-ı asliyyîn gibi hür olmuş iken müvekkil-i müşârun-ileyh rık olmak üzere bi-gayr-ı hakkın bana vaz‘-ı yed etmekle hâlâ suâl olunup müvekkil-i müşârun-ileyh hazretleri kasr-ı yed ve sebîlim tahliyye olunmak üzere vekîl-i mezbûra tenbîh olunması matlûbumdur dedikde gıbbe’s-suâl vekîl-i mezbûr cevâbında müteveffâ-i mezbûrun terekesine ber-vech-i muharrer vaz‘-ı yedini ikrâr mâ‘adâyı inkâr edicek mevsûf-i mezkûrdan müdde‘âsına beyyine taleb olundukda udûl-i Müslimînden müteveffâ-i mezbûrun hayâtında imâmı Mehmed Efendi b. Ahmed ve ahır kethüdâsı Mehmed Ağa b. Mustafa ve müteveffâ-i mezbûrun hayâtında sâkin olduğu el-Hâc Hasan Mahallesi sükkânından Mehmed Ağa b. Ali ve Saka Mehmed Beşe b. Hüseyin ve Berber Yusuf Çelebi b. Abdullah nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka müteveffâ-i mezbûr Mirâhor Yusuf Ağa b. Abdullah b. Abdurrahman hayâtında mevsûf-i mezbûru bizim huzûrumuzda tedbîr-i mutlak ile müdebber edip ve terekesinin sülüsü mevsûf-i mezbûrun kınnen kıymetinin sülüsânına müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Recebi’l-ferd sene 1143. Şuhûdü’l-hâl: Eş-şâhidûn es-sâbikūn.