Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 316 Hüküm no: 310 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden İbrahim Paşa’nın mirahoru Yusuf Ağa’nın kölesi Gürcü asıllı İvaz b. Abdullah’ın hür olduğu Rıkk-ı sâbıkını mu‘terif olmağla ber-vech-i âtî da‘vâya kıbel-i şer‘den me’zûn olan orta boylu, çatık kaşlı, elâ gözlü Gürciyyü’l-asl Müslimü’l-mille bâ‘isü hâze’l-kitâb İvaz b. Abdullah meclis-i şer‘-i şerîf-i enverde vezîriazam-ı sâbık merhûm İbrahim Paşa’nın hayâtında mirâhoru iken bundan akdem vefât eden Yusuf Ağa b. Abdullah b. Abdurrahman’ın zâhirde vâris [ve] vârisesi olmamağla terekesi cânib-i beytülmâle âid olmağın tereke-i mezkûresine vâzı‘u’l-yed olan câmi‘ü’l-emvâli’s-sultânîye hâfızü’l-hazâini’l-Osmaniyye hâlâ şıkk-ı evvel defterdârı sa‘âdetlü semâhatlü Ali Beyefendi b. el-merhûm Mehmed Paşa etbâ‘-ı zevi’l-ihtirâmlarından husûs-ı âti’z-zikre sâbitü’l-vekâle vekîlleri Ebûbekir Ağa b. Şa‘ban mahzarında üzerine da‘vâ ve takrîr-i kelâm edip müteveffâ-i mezbûr Yusuf hayâtında yedinde mülk ve hakkı olduğum hâlde beni tedbîr-i mutlak ile müdebber edip terekesinin sülüsü kınnen kıymetimin sülüsânına müsâ‘id olmağla ben sâir ahrâr-ı asliyyîn gibi hür olmuş iken müvekkil-i müşârun-ileyh müteveffâ-i mezbûrun terekesinden olmak üzere bi-gayr-ı hakkın vaz‘-ı yed etmeğin vekîl-i mezbûra suâl olunup müvekkil-i müşârun-ileyh benden kasr-ı yed ve sebîlim tahliyye olunmak matlûbumdur dedikde gıbbe’s-suâl vekîl-i mezbûr cevâbında müdde‘î-i mezbûra müteveffâ-i mezbûrun terekesinden olmak [üzere] ber-vech-i muharrer vaz‘-ı yedini ikrâr mâ‘adâyı inkâr edicek mevsûf-i mezbûrdan müdde‘âsını mübeyyine beyyine taleb olundukda udûl-i Müslimînden müteveffâ-i mezbûrun hayâtında imâmı Mehmed Efendi b. Ahmed ve ahır kethüdâsı Mehmed Ağa b. Mustafa ve diğer Mehmed Ağa b. Ali ve Berber Yusuf Çelebi b. Abdullah ve Saka Mehmed Beşe b. Hüseyin nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka müteveffâ-i mezbûr Yusuf Ağa b. Abdullah b. Abdurrahman hayâtında mevsûf-i mezbûru yedinde mülk ve hakkı olduğu hâlde bizim huzûrumuzda tedbîr-i mutlak ile müdebber eyledi ve terekesinin sülüsü mevsûf-i mezbûrun kınnen kıymetinin sülüsânına müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mevsûf-i mezbûrun sebîli tahliyye olunmağın mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-ferd sene 1143. Şuhûdü’l-hâl: Eş-şâhidûn es-sâbikūn.